Íslensk ritsnilld – taktu þátt í valinu!
Á bókasýningunni í Frankfurt hefur skapast sú hefð að heiðursgestur sýningarinnar afhendir þeirri þjóð sem tekur við nafnbótinni sérstakt kefli, með áletruðum tillvitnunum í bókmenntir frá viðkomandi löndum.
Á bókasýningunni í Frankfurt hefur skapast sú hefð að heiðursgestur sýningarinnar afhendir þeirri þjóð sem tekur við nafnbótinni sérstakt kefli á lokadegi hennar. Á keflið eru ritaðar tilvitnanir í bókmenntir frá viðkomandi löndum. Kínverjar höfðu þarna nokkur sígild kínversk ljóð, og Argentínumenn, sem eru heiðursgestir í ár, vitna í verk eftir skáldið J.L. Borges. Nú auglýsum við eftir hugmyndum að því hvað Íslendingar ættu að letra á keflið. Hvaða tilvitnun ætti að nota af þessu tilefni, sem eins konar táknmynd íslenskra bókmennta?
Okkur hjá Sagenhaftes Island, verkefninu sem stýrir þátttöku Íslands í Bókasýningunni 2011, þætti vænt um að fá hugmyndir að því hvað ætti að standa á keflinu. Allt kemur til greina: Fornbókmenntir eða nútímabókmenntir, ljóð eða laust mál, en lengdin á helst að vera 5-10 línur. Tillögur má senda á netfangið: info@sagenhaftes-island.is. Ef margar skemmtilegar tillögur berast munum við birta þær hér á vefsíðunni, www.sagenhaftes-island.is. Í júlí verður svo valin tilvitnunin sem letruð verður á keflið. Við hvetjum alla hina fjölmörgu lesendur síðunnar til að taka þátt í þessari óformlegu samkeppni um íslenska ritsnilld!