Íslensk ritsnilld – fer vel af stað!
Samkeppnin fer vel af stað og hafa margar góðar tilvitnanir þegar borist í pósthólf Sagenhaftes Island, allt frá Hávamálum til samtímaskálda.
Samkeppnin um íslenska ritsnilld fer vel af stað og hafa margar góðar tilvitnanir þegar borist í pósthólf Sagenhaftes Island, allt frá Hávamálum:
Deyr fé
deyja frændur
deyr sjálfur hið sama,
en orðstír
deyr aldregi
hveims sér góðan getur.
Og Halldóri Laxness:
Sá sem ekki lifir í skáldskap lifir ekki af hér á jörðinni
Til samtímaskálda eins og Lindu Vilhjálmsdóttur:
bleika frostrósin frá þér
stendur enn keik í glugganum
þótt hélan sé horfin af rúðunum
og við blasi esjan grímsvatnagræn
eins og gróðursæll draumur
Á bókasýningunni í Frankfurt hefur skapast sú hefð að heiðursgestur sýningarinnar afhendir þeirri þjóð sem tekur við nafnbótinni sérstakt kefli á lokadegi hennar. Á keflið eru ritaðar tilvitnanir í bókmenntir frá viðkomandi löndum. Nú köllum við eftir fleiri hugmyndum að því hvað Íslendingar ættu að letra á keflið þegar röðin kemur að þeim. Hvaða tilvitnun ætti að nota af þessu tilefni, sem eins konar táknmynd íslenskra bókmennta?
Eins og áður sagði þá kemur allt til greina: Fornbókmenntir eða nútímabókmenntir, ljóð eða laust mál, en lengdin á helst að vera 5-10 línur. Hólfið stendur ennþá opið fyrir tilllögum: info@sagenhaftes-island.is. Í júlí verður svo valin tilvitnunin sem letruð verður á keflið. Við hvetjum alla hina fjölmörgu lesendur síðunnar til að taka þátt í þessari óformlegu samkeppni um íslenska ritsnilld!