Íslensk ljóðlist á Zebra hátíðinni í Berlín
Kvikmyndahátíðin Zebra Poetry Film Festival í Berlín hefst í dag. Hátíðin, sem í ár er haldin í fimmta skiptið, er mikilvægur vettvangur fyrir ljóðatengdar stuttmyndir og sækir fjöldi kvikmyndagerðamanna hana að hvanæva úr heiminum.
Á hátíðinni í ár verða sýndar stuttmyndir eftir tvo íslenska listamenn: Myndljóðið „Höpöhöpö Böks” eftir Eirík Örn Norðdahl, sem er í keppnisflokki hátíðarinnar, og „Bertram“ eftir Láru Garðarsdóttur. Mynd Eiríks er aðlögun á ljóði eftir kanadíska skáldið Christian Bök, en hann mun að auki taka þátt í norrænum upplestri ásamt öðrum skandinavískum ljóðskáldum, þar á meðal Simen Hagerup og Marie Silkeberg, á hátíðinni.
Stuttmynd Láru er teiknimynd og fjallar um ungan dreng sem dreymir um hvað hann muni verða þegar hann vex úr grasi. Myndin er hluti af barnadagskrá hátíðarinnar. Báðar myndirnar verða sýndar í kvikmyndahúsinu Babylon Mitte.
Hátíðin er framtak Bókmenntasmiðju Berlínarborgar (Literaturwerkstatt Berlin), og á dagskrá hennar verða yfir 900 ljóðatengdar stuttmyndir frá 71 landi sýndar. Fimm manna dómnefnd mun að lokum velja sigurvegara úr 26 mynda keppnisflokki.
Frekari upplýsingar má finna á heimasíðu hátíðarinnar.