Ný bók og bíómyndir
Nýjasta glæpasaga Yrsu Sigurðardóttur, Ég man þig er komin út. Á sama tíma er klár samningur um gerð bíómynda eftir bókum hennar.
Þýska kvikmyndafyrirtækið teamWorx hefur samið við bókaútgáfuna Veröld um að kvikmynda allar bækur Yrsu Sigurðardótur. Kvikmyndafyrirtækið er dótturfyrirtæki Freemantle Media sem er hluti af einu stærsta miðlunarfyrirtæki heims, Bertelsmann. Stefnt er að því að taka myndirnar upp á þýsku á Íslandi.
„Ég hef verið mikill aðdáandi bóka Yrsu frá því ég kynntist verkum hennar fyrst,“ segir Benjamin Benedict, framleiðandi hjá teamWorx. „Ég byrjaði reyndar á þriðju bókinni, las svo þá fyrstu, svo númer tvö og svo þá fjórðu! Þannig að ég hef kannski ekki lesið þær í réttri röð en er mjög hrifinn af því hvernig hún segir sögur. Mér finnst aðalpersóna hennar, lögmaðurinn Þóra Guðmundsdóttir, vera spennandi. Sömuleiðis er umhverfið í sögunum heillandi, náttúra Íslands, landið og fólkið sem þar býr. Þetta er góður efniviður í bíómynd. Við erum búnir að ráða handritshöfund og erum að vinna í að fjármagna myndirnar, þannig að þetta er allt á góðri leið. Við hlökkum mjög til að takast á við þetta stóra verkefni, að skila sögum Yrsu á hvíta tjaldið.“
Nýjasta saga Yrsu Sigurðardóttur, Ég man þig, fjallar um ungt fólk sem er að gera upp hús á Hesteyri í Jökulfjörðum. Þar taka að gerast dularfullir atburðir í tengslum við fortíð staðarins.