Norðurlönd í heiðurssæti á bókamessunni í París
Bókamessan í París verður haldin í 31. sinn dagana 18.-21. mars. Átta íslenskir rithöfundar fylgja þar eftir nýútkomnum verkum sínum á frönsku.
Bókamessan í París - Salon du Livre de Paris - verður haldin í 31. sinn dagana 18.-21. mars. Að þessu sinni eru Norðurlöndin í heiðurssæti á messunni og af því tilefni taka 8 íslenskir höfundar þátt í viðamikilli bókmenntadagskrá messsunnar ásamt tugum annarra norrænna höfunda. Hinn norræni fókus messunnar í ár hefur nú þegar hlotið mikla athygli og umfjöllun í fjölmiðlum í Frakklandi.
Íslensku höfundarnir á messunni eru Auður Ava Ólafsdóttir, Árni Þórarinsson, Áslaug Jónsdóttir, Bragi Ólafsson, Jón Kalman Stefánsson, Steinar Bragi, Steinunn Sigurðardóttir og Yrsa Sigurðardóttir. Þau eru öll að fylgja eftir nýlega útkomnum verkum sínum á frönsku.
Bókamessan er stór viðburður á bókmenntasviði Frakklands, þangað flykkjast um 190.000 bókaunnendur á hverju ári til að hlýða á og bera augum hinn mikla fjölda höfunda sem fram koma í metnaðarfullri bókmenntadagskrá messunnar.
Á norrænum sýningarbás messunnar má m.a. finna bókabúð með hundruðum titla norrænna höfunda í franskri þýðingu. Einnig eru í tengslum við norrænan fókus á Salon du Livre haldin ýmis málþing og ráðstefnur, m.a. fyrir norræna útgefendur, og þýðendur úr norrænum tungumálum á frönsku.
Fylgjast má með viðburðum í dagskrá messunar í beinni útsendingu í gegnum vefsíðu Salon du Livre.
Bókmenntasjóður sér um skipulagningu þátttökunnar fyrir Íslands hönd í samstarfi við systurskrifstofur sínar á Norðurlöndunum, NORLA (NO), FILI (FI), Kunststyrelsen (DK) og Kunstrådet (SV) ásamt norrænu sendiráðunum í París. Samnorræn þátttakan er að mestu fjármögnuð af Norrænu ráðherranefndinni.