Gyrðir fær Bókmenntaverðlaun Norðurlandaráðs
Gyrðir Elíasson hlýtur bókmenntaverðlaun Norðurlandaráðs 2011 fyrir smásagnasafnið Milli trjánna. Verðlaunin voru tilkynnt í Ósló fyrir skömmu.
Gyrðir Elíasson hlýtur bókmenntaverðlaun Norðurlandaráðs 2011 fyrir smásagnasafnið Milli trjánna. Verðlaunin voru tilkynnt í Ósló fyrir skömmu.
Í umsögn dómnefndarinnar segir að bókin sé „stílhreint og framúrskarandi skáldverk sem lýsir innri og ytri átökum og er í samræðu við heimsbókmenntirnar.“ Auk Gyrðis var Ísak Harðarson tilnefndur fyrir hönd Íslands, en alls voru 13 norrænir rithöfundar tilnefndir. Gyrðir er sjöundi íslenski rithöfundurinn til að hljóta verðlaunin, síðast hlaut Sjón þau árið 2005 fyrir skáldsöguna Skugga-Baldur.
Bókmenntaverðlaun Norðurlandaráðs fagna nú hálfrar aldar afmæli sínu, en svo skemmtilega vill til að Gyrðir varð sjálfur fimmtugur 4. apríl síðastliðinn. Hann mun taka við verðlaununum á Norðurlandaráðsþinginu 2. nóvember 2011 í Kaupmannahöfn.
Ljósmynd: Kristinn Ingvarsson