Dagur íslenskrar ljóðlistar
„Dagur íslenskrar ljóðlistar“ í tíu bókmenntahúsum í Þýskalandi, Austurríki og í Sviss með fjölbreyttri dagskrá þar sem íslensk skáld munu lesa víða.
8. júní var haldinn „Dagur íslenskrar ljóðlistar“ í tíu bókmenntahúsum í Þýskalandi, Austurríki og í Sviss með fjölbreyttri dagskrá þar sem íslensk skáld lásu upp víða.
Gestir bókmenntahúsanna fengu þennan dag að gjöf safnbók íslenskrar ljóðlistar á þýsku, Isländische Lyrik, sem þýska bókaforlagið Insel Verlag gefur út í lok júlí. Í ritinu er íslenskri ljóðlist gerð skil í allri sinni breidd, frá elstu kvæðum miðalda til samtímaljóðlistar, í einni bók í fyrsta sinn á þýsku.
Sögueyjan Ísland fékk til liðs við sig nemendur við Listaháskóla Íslands sem gerðu myndbönd við valin ljóð úr safnritinu.
Ljóðamyndböndin voru sýnd í anddyri Literaturhaus Frankfurt á „Degi íslenskrar ljóðlistar“ og voru auk þess sýnd á þýsk-frönsku menningarsjónvarpsstöðinni ARTE. Myndböndin má nálgast á heimasíðu stöðvarinnar.
„Dagur íslenskrar ljóðlistar“ er samstarfsverkefni Sögueyjunnar og þýskumælandi bókmenntahúsa. Nánari upplýsingar um viðburðinn má nálgast hér (á þýsku).