Fjölsótt og glæsileg kynning Íslendingasagna
Höllin Corvey í Westfalen myndaði stórkostlegt svið fyrir þriggja daga kynningu Íslendingasagna. Tilefnið var útgáfa forlagsins á nýrri þýðingu Íslendingasagna í fimm bindum núna í september.
Höllin Corvey í Westfalen, upphaflega klaustur sem stofnað var um það leyti sem Ísland var numið, myndaði stórkostlegt svið fyrir þriggja daga kynningu Íslendingasagna, sem Literaturbüro Ostwestfalen-Lippe stóð fyrir í samvinnu við Sögueyjuna og forlagið S. Fischer. Tilefnið var útgáfa forlagsins á nýrri þýðingu Íslendingasagna í fimm bindum núna í september.
Fjöldi þekktra þýskra leikara kom fram, þar á meðal Angela Winkler, Michael Altmann, Corinna Harfouch og Matthias Habich, og las uppúr sögunum í dagskrá sem varði frá morgni til kvölds. Upplesturinn var rofinn með fyrirlestrum þýskra og íslenskra fræðimanna, svosem Vésteins Ólasonar og Kurt Schier, og upplestrum rithöfunda, þar sem m.a. mátti heyra Sjón og Einar Kárason, auk þes sem argentínski rithöfundurinn Alberto Manguel, náinn vinur Borgesar, sagði frá lestri þess síðarnefnda á Íslendingasögum og þýðingu hans á Gylfaginningu. Ennfremur voru umræður þýðenda með þátttöku fulltrúa frá Norðurlöndum Inn á milli var leikin tónlist, meðal annars af norska bassaleikaranum Arild Andersen, Caput hópnum og Ólafi Arnalds.
Er skemmst frá því að segja að kirkjur og salir Corvey fylltust af áhugasömum hlustendum allan tímann meðan dagskráin varði. Er óhætt að segja að aldrei hafi önnur eins kynning verið haldin á íslenskum miðaldabókmenntum eins og þarna var gert, en dagskrána má sjá á http://www.island-saga-lesefest.de/.