Erró í Schirn: „Portrait and Landscape“
Tímamótasýning Errós í SCHIRN opnar 6. október. Tvær stórar myndaraðir, „Scapes“ og „Monsters“, verða sýndar.
6. október opnar einkasýning Errós, „Erró. Portrait and Landscape“, í SCHIRN listasafninu í Frankfurt, og mun þar með deila þessu virta safni með öðrum íslenskum listamanni, Gabríelu Friðriksdóttur, sem opnaði umtalaða sýningu þar 28. september.
Á sýningunni verður verkum Errós gerð vegleg skil þar sem tvær stórar myndaraðir, „Scapes“ og „Monsters“, verða sýndar. Um tímamót er að ræða þar sem sú síðarnefnda hefur aldrei áður verið sýnd opinberlega í heild sinni, en Erró vann „Monsters“ verkin á árunum 1967-68.
Auk myndverkanna verða sýndar valdar kvikmyndir Errós frá sjöunda áratugnum, sem brúa bilið milli myndaraðanna tveggja. Þar á meðal eru verkin „Grimaces“ og „Stars“.
Sýningin er hluti af hinni umfangsmiklu kynningu á íslenskri menningu sem nú á sér stað í hinum þýskumælandi heimi vegna Bókasýningarinnar í Frankfurt. „Erró. Portrait and Landscape“ hefst, eins og fyrr sagði, 6. október, og stendur yfir til 8. janúar 2012.