Tilnefningar til Íslensku bókmenntaverðlaunanna
Fimmtudaginn 1. desember var tilkynnt um hvaða 10 bækur eru tilnefndar til Íslensku bókmenntaverðlaunanna 2011. Athöfnin fór fram í Listasafni Íslands.
Fimmtudaginn 1. desember 2011 var tilkynnt um hvaða 10 bækur eru tilnefndar til Íslensku bókmenntaverðlaunanna 2011. Athöfnin fór fram í Listasafni Íslands.
Tilnefnt er í tveimur flokkum, flokki fagurbókmennta og í flokki fræðibóka og rita almenns efnis og eru 5 bækur tilnefndar í hvorum flokki. Verðlaunaupphæðin fyrir hvorn flokk er nú kr. 1.000.000.
Tvær þriggja manna dómnefndir sjá um valið á þeim bókum sem þykja hafa skarað fram úr á útgáfuárinu 2011. Dómnefnd fagurbókmennta var skipuð þeim Árna Matthíassyni, Viðari Eggertssyni og Þorgerði Elínu Sigurðardóttur. Í dómnefnd fræðibóka og rita almenns efnis sátu Þorgerður Einarsdóttir, Jón Ólafsson og Auður Styrkársdóttir.
Eftirfarandi bækur eru tilnefndar í flokki fagurbókmennta:
Guðrún Eva Mínervudóttir: Allt með kossi vekur. Útgefandi: JPV útgáfa
Hallgrímur Helgason: Konan við 1000°. Útgefandi: JPV útgáfa
Jón Kalman Stefánsson: Hjarta mannsins. Útgefandi: Bjartur
Oddný Eir Ævarsdóttir: Jarðnæði. Útgefandi: Bjartur
Steinunn Sigurðardóttir: jójó. Útgefandi: Bjartur
í flokki fræðibóka og rita almenns efnis voru tilnefningar eftirfarandi:
Ármann Jakobsson og Þórður Ingi Guðjónsson: Morkinskinna I og II bindi. Útgefandi: Hið íslenzka fornritafélag
Inga Elsa Bergþórsdóttir og Gísli Egill Hrafnsson: Góður matur, gott líf – í takt við árstíðirnar. Útgefandi: Vaka-Helgafell
Jón Yngvi Jóhannsson: Landnám – ævisaga Gunnars Gunnarssonar. Útgefandi: Mál og menning
Páll Björnsson: Jón forseti allur? Táknmyndir þjóðhetju frá andláti til samtíðar. Útgefandi: Sögufélag
Sigríður Víðis Jónsdóttir: Ríkisfang: Ekkert - Flóttinn frá Írak á Akranes. Útgefandi: Mál og menning
Formenn dómnefndanna tveggja munu velja einn verðlaunahafa úr báðum flokkum ásamt forsetaskipuðum formanni lokadómnefndar. Íslensku bókmenntaverðlaunin 2011 verða afhent um mánaðarmótin janúar-febrúar á komandi ári af Forseta Íslands á Bessastöðum.
Tilnefnt til Íslensku þýðingaverðlaunanna 2011
Einnig voru tilkynntar tilnefningar til Íslensku þýðingaverðlaunna. Dómnefnd á vegum Bandalags þýðenda og túlka völdu þær fimm þýðingar sem þykja skara framúr útgáfuárið 2011.
Bandalag þýðenda og túlka stendur fyrir Íslensku þýðingaverðlaununum og veitir Forseti Íslands þau á degi bókarinnar 23. apríl ár hvert á Gljúfrasteini. Bakhjarlar verðlaunanna eru Rithöfundasamband Íslands og Félag íslenskra bókaútgefenda.
Eftirfarandi bækur eru tilnefndar til Íslensku þýðingaverðlaunanna 2011:
Andarsláttur eftir Hertu Müller. Þýðandi: Bjarni Jónsson. Útgefandi: Ormstunga
Fásinna eftir Horacio Castellanos Moya. Þýðandi: Hermann Stefánsson. Útgefandi: Bjartur
Regnskógabeltið raunamædda eftir Claude Lévi-Strauss. Þýðandi: Pétur Gunnarsson. Útgefandi: JPV útgáfa
Reisubók Gúllívers eftir Jonathan Swift. Þýðandi: Jón St. Kristjánsson. Útgefandi: Mál og menning
Tunglið braust inn í húsið. Ljóð eftir marga höfunda. Þýðandi: Gyrðir Elíasson. Útgefandi: Uppheimar