Frankfurt verkefninu fylgt eftir með stuðningi íslenskra fyrirtækja
Árangur sem náðst hefur við útbreiðslu íslenskra bókmennta festur í sessi. Sögueyjan lætur að sér kveðja á bókasýningum í vor.
Í fyrra lauk heiðursári Íslands á Bókasýningunni í Frankfurt sem þótti takast vel, yfir 200 bækur tengdar Íslandi komu út á þýsku og íslenski sýningarskálinn hlaut einróma lof. Stjórnvöld tóku þá ákvörðun að fylgja verkefninu eftir á þessu ári og festa með því í sessi þann árangur sem náðst hefur við útbreiðslu íslenskra bókmennta erlendis.
Er gert ráð fyrir að Sögueyjan, eins og verkefnið heitir á íslensku, láti að sér kveða á bókasýningum í vor, svo sem í Leipzig, Bologna – þar sem barnabækur eru í brennidepli – og í London. Þar verða íslenskar bækur kynntar fyrir erlendum útgefendum og rækt lögð við þau sambönd sem urðu til vegna vinnunnar í kringum Frankfurt.
Helstu samstarfsaðilar Sögueyjunnar á síðasta ári ætla að leggja henni lið við þessa eftirfylgni. Þannig verður Actavis aðalstyrktaraðili verkefnisins á þessu ári, en aðrir sem ganga til samstarfsins eru Landsbankinn, Icelandair, Prentsmiðjan Oddi og Íslandsstofa. Það er, að dómi forsvarsmanna Sögueyjunnar, sérstakt fagnaðarefni að íslensk fyrirtæki skuli sýna úthald og vilja til að fylgja verkefninu eftir á nýju ári og stuðla þar með að áframhaldandi útbreiðslu íslenskra bókmennta erlendis.