Sögueyjan á Bókasýningunni í Leipzig
Bókasýningin í Leipzig, vorboði bókaársins í Þýskalandi, hefst 15. mars. Sem fyrr verða þar íslenskar bókmenntir áberandi en sex íslenskir höfundar taka þátt í sýningunni í ár.
Bókasýningin í Leipzig, vorboði bókaársins í Þýskalandi, hefst 15. mars og stendur yfir til 18. mars. Sem fyrr verða þar íslenskar bókmenntir áberandi en sex íslenskir höfundar taka þátt í sýningunni í ár.
Pétur Gunnarsson mun þar fylgja eftir velgengni þýskrar þýðingar Punkts punkts komma striks, sem kom út í fyrra, með upplestrum úr þýðingu annarrar Andrabókarinnar Ég um mig frá mér til mín sem kom nýverið út hjá Weidle Verlag.
Yngsta kynslóð lesenda verður í brennidepli á sýningunni í ár og munu barnabókahöfundarnir Sigrún Eldjárn og Hallfríður Ólafsdóttir kynna þar bækur sínar. Sigrún Eldjárn verður með kynningu á nýrri útgáfu hinnar sígildu barnabókar Bétveir, sem hefur verið endurprentuð með nýjum teikningum, og Hallfríður Ólafsdóttir verður með upplestrar- og tónlistardagskrá helgaða Maxímus Músíkús. Kristín Steinsdóttir, rithöfundur og formaður Rithöfundasambandsins, mun svo taka þátt í ráðstefnu um barnabókmenntir og læsi í Norður-Evrópu og Þýskalandi auk þess að kynna Íslendingasögurnar fyrir þýskum börnum.
Steinunn Sigurðardóttir, sem löngum hefur verið vinsæl meðal þýskra lesenda, mun einnig lesa upp úr verkum sínum, þar á meðal Góða Elskhuganum sem kom út í þýskri þýðingu í fyrra. Ingibjörg Hjartardóttir mun svo lesa upp úr bókinni Hlustarinn, sem kom út í tengslum við Bókasýninguna í Frankfurt 2011.
Frekari upplýsingar um dagskrá Sögueyjunnar í Leipzig má sækja hér (PDF -- á þýsku).