Húslestrar á Listahátíð 2012

18.4.2012

Listahátíð í Reykjavík verður haldin 18. maí til 3. Júní, þar sem boðið verður upp á kynstrin öll af spennandi menningarviðburðum.

Sem fyrr bjóða íslenskir höfundar heim í húslestra, en þetta er í fjórða sinn sem gestum gefst færi á að heyra og sjá uppáhaldshöfund sinn á Listahátíð.

Höfundar opna dyr sínar upp á gátt og halda húslestra á heimilum sínum. Hver viðburður er einstakur og aðeins fá sæti í boði. Í húslestrunum ægir öllu saman; ljóðum, sögubrotum, barnabókmenntum, útgefnu efni og nýskrifuðu.

Nýmæli í ár eru þrír húslestrar á þýsku. Það eru þau Einar Kárason, Yrsa Sigurðardóttir og Kristín Marja Baldursdóttir  sem bjóða í húslestra sem fram fara á þýsku, eftir góðar viðtökur í haust þegar Ísland var heiðursgestur á Bókasýningunni í Frankfurt. Þýskir húslestrar fara fram í samstarfi við Sögueyjuna.

Nálgast má dagskrá húslestranna og miðasölu á heimasíðu Listahátíðar í Reykjavíkur.