Ísland í Frankfurt 2012
Eitt ár er nú liðið frá því Ísland var heiðursgestur á Bókasýningunni í Frankfurt. Sú heimilislega stemning sem ríkti heiðursskálanum í fyrra verður endursköpuð í smærri mynd á íslenska standinum í ár.
Eitt ár er nú liðið frá því Ísland var heiðursgestur á Bókasýningunni í Frankfurt. Venju samkvæmt eru bókmenntir einnar þjóðar, eða málsvæðis, í brenndepli hverju sinni og í ár er Nýja-Sjáland í kastljósinu. Á næsta ári verður Brasilía heiðursgestur og árið 2014 skipa finnskar bókmenntir heiðurssessinn.
Í ár stendur Bókasýningin í Frankfurt yfir frá 10.-14. október og verða íslenskir bókaútgefendur með stand í höll 5 (5.0 A933) þar sem sú heimilislega stemning sem ríkti í íslenska heiðursskálanum í fyrra verður endursköpuð í smærri mynd.
Ísland mun koma við sögu í heiðursskála Nýsjálendinga á meðan á sýningunni stendur. Á miðvikudeginum kl. 15:30 munu Sigtryggur Magnason, ljóð- og leikskáld, og Bill Manhire, eitt helsta ljóðskáld Nýsjálendinga, ræða um sögur landanna tveggja og hvernig heiðursþátttaka á Bókasýningunni í Frankfurt getur hjálpað við að miðla þeim víðar. Dagskráin hefur hlotið nafnið „New Zealand - Iceland with trees?“ og mun Thomas Böhm, fyrrum liðsmaður Sögueyjunnar, stýra umræðunum.