Starf Miðstöðvar íslenskra bókmennta á fyrri hluta árs 2013
Á hverju ári safnast saman á helstu bókamessum útgefendur, umboðsmenn og almenningur til að selja og kaupa þýðingarrétt og fá upplýsingar um helstu strauma og stefnur í bókaheiminum. Það er nauðsynlegt fyrir útgefendur sem og aðra þá er standa að kynningum á íslenskum bókmenntum erlendis að mæta á slíkar messur til að hitta kollegana og stofna til nýrra sambanda í hinum alþjóðlega útgáfuheimi. Íslenskar útgáfur hafa um árabil mætt á helstu bókamessur í þessu augnamiði, þar á meðal íFrankfurt, London, Gautaborg og Bologna. Sögueyjan Ísland hefur einnig sótt bókamessuna í Leipzig í Þýskalandi sem hluta af starfi við bókmenntakynningu í Þýskalandi og sem eftirfylgni við verkefnið eftir að því lauk.
Miðstöð íslenskra bókmennta tók við hlutverki Bókmenntasjóðs í samstarfi norrænu bókmenntakynningastofanna um undirbúning og skipulag á bókmenntadagskrá í Kennedy Center í Washington D.C. í Bandaríkjunum í mars síðastliðnum. Dagskráin var hluti af norrænu menningarhátíðinni Nordic Cool sem haldin var í Kennedy Center í febrúar og mars. Af sama tilefni var á vegum norrænu bókmenntakynningastofanna og norrænu sendiráðanna í Washington D.C. haldið útgefenda- og þýðendaþing fyrir hóp þýðenda og bandarískra útgefenda norrænna bókmennta.