Bækurnar Öræfi, Lífríki Íslands og Hafnfirðingabrandarinn hlutu Íslensku bókmenntaverðlaunin 2014
Höfundarnir Ófeigur Sigurðsson, Bryndís Björgvinsdóttir og Snorri Baldursson, hljóta hvert um sig eina miljón króna í verðlaun.
Höfundarnir Ófeigur Sigurðsson, Bryndís Björgvinsdóttir og Snorri Baldursson, hljóta hvert um sig eina miljón króna í verðlaun.
Íslensku bókmenntaverðlaunin fyrir árið 2014 voru afhent við hátíðlega athöfn á Bessastöðum föstudaginn 30. janúar.
Í flokki fagurbókmennta hlaut Ófeigur Sigurðsson verðlaunin fyrir skáldsöguna Öræfi, sem gefin er út af Máli og menningu.
Í flokki fræðirita og bóka almenns efnis hlaut verðlaunin Snorri Baldursson fyrir Lífríki Íslands sem Opna/Forlagið gefur út.
Nú voru afhent í annað skiptið verðlaun í nýjum flokki barna- og ungmennabóka og hlaut Bryndís Björgvinsdóttir þau fyrir skáldsöguna Hafnfirðingabrandarinn, sem gefin er út af Vöku Helgafelli.
Verðlaunafé er ein milljón króna í hverjum flokki. Auk þess fengu verðlaunahafar afhent skrautrituð verðlaunaskjöl og verðlaunagripi sem hannaðir eru af Jóni Snorra Sigurðssyni á gullsmíðaverkstæði Jens; opin bók á granítstöpli með nafni verðlaunahöfundar og bókar hans.