Fréttir

Bookseller barnabókaráðstefna í London

Tveir fulltrúar íslenskrar barnabókaútgáfu taka þátt

6.9.2016

Fagtímaritið The Bookseller stendur fyrir barnabókaráðstefnu í London 27. september næstkomandi undir yfirskriftinni Keeping Children's Books at the Centre of the UniverseÞar taka þátt 35 útgefendur og ritstjórar barna- og ungmennabóka á Norðurlöndum og Bretlandi og er markmiðið að leiða þá saman, kynna útgáfu landanna, efla tengslin og auka veg norrænna bóka í Bretlandi.

NordLit, samtök norrænu bókmenntakynningarstofanna, hafa milligöngu um að koma útgefendum og ritstjórum sinna landa á ráðstefnuna. Tveir útgefendur barna – og ungmennabóka fara fyrir milligöngu Miðstöðvar íslenskra bókmennta á ráðstefnuna, þær Birgitta Elín Hassell frá Bókabeitunni og Sigþrúður Silju Gunnarsdóttir frá Forlaginu. Þær munu taka þátt í ráðstefnunni og umræðum um ýmis mál sem lúta að útgáfu barna- og ungmennabóka, lestrarhvetjandi verkefnum og markaðnum á Íslandi.

Þátttaka í ráðstefnunni er í samræmi við stefnu stjórnar Miðstöðvarinnar sem vill auka veg og vanda barna- og ungmennabókmennta og styrkja þýðingar á vönduðum bókum fyrir þennan aldurshóp.

Ráðstefna Bookseller fer fram í Barbican Centre í London. Sjá dagskrá hér