Elísabet Jökulsdóttir, Guðbergur Bergsson, Hugleikur Dagsson og Kári Tulinius meðal gesta í Helsinki
Norðurlöndin í brennidepli á bókamessunni í ár
Norræna menningargáttin (Kulturkontakt Nord), sendiráð Danmerkur, Noregs og Íslands í Helsinki ásamt menningarmiðstöðinni Hanaholmen í Svíþjóð og Pohjola-Norden í Finnlandi voru með sameiginlegan bás og stóðu að þrjátíu viðburðum á messunni.
Norðurlöndin voru í brennidepli á bókamessunni í Helsinki dagana 27. – 30. október. Norræna menningargáttin (Kulturkontakt Nord), sendiráð Danmerkur, Noregs og Íslands í Helsinki ásamt menningarmiðstöðinni Hanaholmen í Svíþjóð og Pohjola-Norden í Finnlandi voru með sameiginlegan bás og stóðu að þrjátíu viðburðum á messunni.
Meðal þátttakenda voru íslensku höfundarnir sem tilnefndir voru til Bókmenntaverðlauna Norðurlandaráðs 2016; Guðbergur Bergsson fyrir Þrír sneru aftur og Elísabet Jökulsdóttir fyrir Ástin ein taugahrúga. Enginn dans við Ufsaklett. Þau tóku þátt í spjalli með tilnefndu höfundunum Linn Ullman, Sara Margrethe Oskal, Sirpa Kähkönen, Sabine Forsblom, Carina Karlsson og Sørine Steenholdt undir stjórn Oscar Rossi.
Hugleikur Dagsson ræddi um verk sín í tveimur dagskrárliðum á messunni en bækur hans hafa verið seldar í yfir 70 þúsund eintökum í Finnlandi og var hann í dagskránni kynntur sem vinsælasti Íslendingurinn þar í landi. Útgefandi Hugleiks í Finnlandi er Atena. Kári Tulinius, skáld og einn stofnenda Meðgönguljóða, spjallaði á laugardeginum við finnska skáldið Vilja-Tuulia Huotarinen um íslenskar nútímabókmenntir á samnorræna básnum og margir hlýddu á. Á lokadegi messunnar var dagskrá um íslenska nútímaljóðlist þar sem lesin voru ljóð á finnsku eftir skáldin Gerði Kristnýju, Sigurð Pálsson, Ingunni Snædal, Þórdísi Gísladóttur og Eirík Örn Norðdahl í þýðingu Tapio Koivukari.
Góður rómur var gerður að hátíðinni í ár og norrænu dagskránni sem þótti vel skipulögð og var vel sótt.
Elísabet Jökulsdóttir |
Kári Tulinius |
Hugleikur Dagsson |
Guðbergur Bergsson |
---|