Garðurinn seldur til Noregs
Gerður Kristný fetar í fótspor stórskálda...
Norska forlagið Bokvennen hefur keypt útgáfuréttinn að Garðinum, metsölubók Gerðar Kristnýjar frá því í fyrra. Slæst hún þar með í hóp með Steini Steinarri og Snorra Sturlusyni, en forlagið hefur séð um útgáfu verka þeirra í Noregi. Útgáfurétturinn að bókinni hefur einnig verið seldur til forlagsins Bloomsbury/Berlin Verlag í Þýskalandi.
Garðurinn er spennusaga, með yfirnáttúrulegu ívafi, ætluð börnum og unglingum á aldrinum 11-15 ára. Í bókinni er fjallað um stúlkuna Eyju sem flytur í stórt hús við kirkjugarð í Reykjavíkurborg. Inn á nýja heimilið er keyptur forn leðurstóll, en Eyja finnur strax að eitthvað illt fylgir þessu húsgagni. Í ljós kemur að stóllinn hefur að geyma bréfasafn frá árinu 1918, þegar spænska veikin herjaði á Ísland. Grunur Eyju um að ekki sé allt með felldu styrkist þegar faðir hennar veikist heiftarlega, við það upphefst spennandi rannsókn þar sem Eyja hefst við að leysa ráðgátuna.
Gerður Kristný er nýkomin heim frá borginni Lahti í Finnlandi þar sem hún tók þátt í rithöfundaþingi. Þar las hún upp úr verkum sínum og stjórnaði að auki pallborðsumræðum þingsins á lokakvöldinu. Frammistaða hennar þar rataði í finnska fjölmiðla þar sem spaug hennar um efnahagsástandið á Íslandi vakti mikla lukku, en hún kvaðst vera frá landi elds, íss og fjármálaóreiðu og sníkti smáaura af viðstöddum.