Spiegel mælir með Auðninni eftir Yrsu Sigurðardóttur
Bókin valin ein af þremur mikilvægustu bókum liðinnar viku
Þýska vikuritið Spiegel hefur valið bók Yrsu Sigurðardóttur Auðnina sem eina af þremur mikilvægustu bókum síðustu viku. Auðnin kom nýverið út í þýskri þýðingu en Fischer Verlag gefur hana út.
Auðnin lýsir einangruðum rannsóknarbúðum íslensks fyrirtækis á Norðaustur Grænlandi. Lögfræðingurinn Þóra Guðmundsdóttir tekur þátt í leiðangri sem gerður er til að kanna aðstæður í búðunum og afdrif tveggja Íslendinga sem þar dvelja og ekkert hefur heyrst frá.
Gagnrýnandi Spiegel segir að söguhetja Peter Høegs Smilla, hafi nú fengið eftirmann sem að vísu hafi takmarkaðan áhuga á snjónum. Blaðið segir að Grænland sé nánast við bæjardyrnar hjá Íslendingum, ekki bara fyrir íslenska glæpasagnahöfunda, heldur einnig fyrir verkfræðinga en Yrsa starfi einmitt einnig sem verkfræðingur. Í Auðninni sameini hún því frásagnarhæfileika sína og eigin reynslu. „Og bláleit spor í ísnum leiða mann á ókunnar slóðir þar sem villtir hundar og stórhættulegar verur leynast."