Kristín Steinsdóttir og Andri Snær Magnason á bókasýningunni í Leipzig
Á eigin vegum, Lovestar og "Die Lange Nacht der Nordischen Literatur"
Bókasýningin í Leipzig í Þýskalandi verður haldin dagana 18. – 21. mars. Þetta er næst stærsta bókasýningin í Þýskalandi og er hún haldin í mars á hverju ári. Gestir sýningarinnar í fyrra voru 147.000 talsins sem er um helmingur þess fjölda sem sækir bókasýninguna í Frankfurt og fjöldi sýnenda 2345 frá 38 löndum.
Í Leipzig að þessu sinni munu tveir íslenskir rithöfundar kynna bækur sínar. Kristín Steinsdóttir kynnir og les upp úr Á eigin vegum sem þýska forlagið forlagið C.H. Beck gefur út undir nafninu Eigene Wege og Andri Snær Magnason kynnir Lovestar sem Bastei Lübbe gefur út.
Þetta er í annað skipti sem Sagenhaftes Island tekur þátt í bókasýningunni í Leipzig. Sendiráð Íslands í Berlín, í samvinnu við sendiráð hinna Norðurlandanna, á veg og vanda að undirbúningi sameiginlega sýningarbássins og Norræni menningarsjóðurinn styrkir þátttöku sendiráðanna.
Í fyrra var íslenski básinn mjög vel sóttur og hvarvetna mátti sjá gesti fletta í þeim fjölmörgu íslensku bókum sem þar lágu frammi. Upplýsingabæklingar um íslenskar bókmenntir og Ísland runnu út eins og heitar lummur og má gera ráð fyrir að áhugi gesta á Íslandi og íslenskum bókmenntum verði ekki minni í ár nú þegar einungis nokkrir mánuðir eru þar til Ísland tekur við kefli heiðusgests bókasýningarinnar í Frankfurt af Argentínumönnum. Sú athöfn mun eiga sér stað í lok bókasýningarinnar í Frankfurt í haust en sýningin stendur frá 6. til 10. október.
Segja má að einn af hápunktum bókasýningarinnar verði á föstudagskvöldið þegar um 400 gestir sækja „Die Lange Nacht der Nordischen Literatur“ eða hina löngu nótt norrænna bókmennta. Kristín og Andri Snær verða meðal gesta þar.
Bókasýningin í Leipzig hefst eins og áður segir fimmtudaginn 18. mars og stendur til sunnudagsins 21. mars.