Allir lesa - árlegur landsleikur í lestri

Miðstöð íslenskra bókmennta og Reykjavík Bókmenntaborg UNESCO hafa stofnað lestrarvef og efna þar árlega til skemmtilegs leiks sem ber yfirskriftina ALLIR LESA, landsleikur í lestri. Keppendur skrá lestur sinn á vefinn allirlesa.is

Markmiðið með allirlesa er að auka lestur þjóðarinnar

og fá fleiri til að njóta þess sem lesturinn færir hverjum og einum. Leiknum er ætlað að hvetja þá sem lesa til að lesa enn meira og hina sem lesa lítið eða ekki neitt, að hefja lesturinn. Allir lesa landsleikurinn er einstaklings- og liðakeppni í lestri, með svipuðu fyrirkomulagi og Hjólað í vinnuna.

Leikurinn gengur út á að fólk á öllum aldri, skrái á netinu þá titla sem þeir lesa og þann tíma sem þeir verja í lestur. Þar sem leshraði fólks er mismunandi og háður ótal þáttum er ekki farin sú leið að telja blaðsíður, heldur eru það mínútur sem gilda. Þetta er ekki hraðlestrarkeppni, fólk getur notið þess að lesa í rólegheitunum.

Það skiptir ekki máli hvernig bækur fólk les eða á hvaða formi - prentaðan texta, rafbók eða hljóðbók - allar tegundir bóka eru gjaldgengar í keppninni og öll tungumál. Hér er átt við bækur sem innihalda til dæmis skáldskap, fræði, skýrslur eða eitthvað allt annað. 

Landsleikurinn er liðakeppni, þar sem vinnustaðir, heimili, skólabekkir, vinahópar og fleiri geta tekið þátt. Fyrsti landsleikurinn fór fram 17. október til 16. nóvember 2014, í annað sinn fór hann fram 21. janúar til 22. febrúar 2016 og næsti landsleikur verður 27. janúar til 19. febrúar 2017.

www.allirlesa.is

Sjá nánar fréttir um ALLIR LESA:


ALLIR LESA, landsleikur í lestri – skráning hafin á allirlesa.is

www.allirlesa.is kominn í loftið

Frábær byrjun á Allir lesa - mikill fjöldi liða þegar skráður til leiks

ALLIR LESA – þúsundir landsmanna taka þátt í landsleik í lestri

Heildarlestur samsvarar átta árum. Sigurvegarar í landsleiknum koma alls staðar að af landinu. 

Allir lesa hlaut Íslensku auglýsingaverðlaunin, Lúðurinn, í flokki almannaheillaauglýsinga