Heildaryfirlit styrkja á árinu 2016. Hátt í 300 styrkir í átta flokkum

Á árinu 2016 úthlutaði stjórn Miðstöðvar íslenskra bókmennta um 270 styrkjum í átta flokkum og er það töluverð aukning frá fyrra ári í öllum flokkum. Sótt var um rúmar 160 milljónir og til úthlutunar voru 67 milljónir, eða rúmlega 40% af umsóttri upphæð

2. janúar, 2017

63% fleiri umsóknir um styrki til þýðinga á íslensku 

Á árinu 2016 bárust samtals 67 umsóknir um styrki til þýðinga á íslensku. Heildarúthlutun á árinu var tæplega 18 milljónir króna til 49 þýðingaverkefna, en auglýst er tvisvar á ári eftir umsóknum, í mars og nóvember. Til samanburðar var heildarfjöldi umsókna um þýðingastyrki 41 á árinu 2015 og því nemur fjölgun umsókna um sextíu og þremur prósentum á ársgrundvelli. Árið 2015 var úthlutað rúmlega 13.7 milljónum króna til 33 þýðingaverkefna. 

Aldrei fleiri umsóknir um styrki til þýðinga á erlend mál

Á árinu 2016 voru 97 umsóknir frá erlendum útgefendum til afgreiðslu, þar af 19 til þýðinga á íslenskum verkum á norræn tungumál, sem er aukning frá fyrra ári, en þá voru umsóknir um þýðingar á erlend mál 90 talsins. Til úthlutunar á árinu voru 15 milljónir króna auk um 5,5 milljóna króna sem Norræna ráðherranefndin leggur til þýðinga úr íslensku á norræn tungumál. Í heild voru veittir samtals styrkir til 92 þýðinga úr íslensku og hafa styrkir til erlendra þýðinga aldrei verið fleiri.

Útgáfustyrkir heldur fleiri í ár

Á árinu 2016 bárust 80 umsóknir um útgáfustyrki frá 28 útgefendum og sótt var um tæpar 57 milljónir króna. Stjórn Miðstöðvar íslenskra bókmennta úthlutaði 23.3 milljónum króna til 55 verka og er það nokkur aukning á milli ára. Til samanburðar var í fyrra úthlutað 20.6 milljónum til 45 útgáfuverkefna en þá bárust 57 umsóknir um útgáfustyrki frá 33 aðilum og sótt var um alls 50.5 milljónir króna. Útgáfustyrkir eru veittir einu sinni á ári og er þeim ætlað að styðja við útgáfu og miðlun íslenskra ritverka.

Umsóknum um ferðastyrki höfunda fjölgar enn

57 umsóknir bárust um ferðastyrki á árinu og voru veittir 43 styrkir að upphæð 3.126.000 kr. Þetta er fjölgun umsókna frá árinu 2015 þegar 47 umsóknir bárust og veittir voru 36 styrkir. Höfundar, erlendir útgefendur og stjórnendur bókmennta- og menningarhátíða geta sótt um ferðastyrki í tengslum við útgáfu og kynningu íslenskra höfunda á verkum sínum erlendis.

Nýræktarstyrkir endurspegla gróskuna

Árið 2016 úthlutaði Miðstöð íslenskra bókmennta 2 milljónum króna í Nýræktarstyrki  og bárust alls 35 umsóknir. Sex höfundar hlutu styrki að þessu sinni til útgáfu fimm verka og var styrkupphæð hvers 400.000 kr. Verkin sem sótt var um fyrir eru af ýmsum toga s.s. skáldsögur, leikrit, ljóð, barna- og ungmennabækur, smásögur og glæpasögur og má segja að verkin endurspegli mikla grósku á bókmenntasviðinu. Umsóknum um Nýræktarstyrki hefur fjölgað árlega frá því þeim var fyrst úthlutað hjá Bókmenntasjóði, forvera Miðstöðvar íslenskra bókmennta, árið 2008, en þá bárust 9 umsóknir og 5 styrkir voru veittir, hver að upphæð 200.000 kr. 

Kynningarþýðingar á íslenskum verkum vegna útgáfu erlendis

Á árinu var úthlutað 20 kynningarþýðingastyrkjum, samtals að upphæð tæplega 400 þúsund, en alls bárust 22 umsóknir. Styrkirnir eru veittir til þýðinga á sýnishorni úr íslensku verki sem ætlað er að nota í kynningu erlendis. Þeir sem geta sótt um eru innlendir og erlendir þýðendur, höfundar, útgefendur og umboðsmenn.

Þýðendur í Gunnarshúsi

Árlega veitir Miðstöð íslenskra bókmennta, í samstarfi við Rithöfundasamband Íslands, þýðendum íslenskra bókmennta styrki til dvalar í Gunnarshúsi, auk ferðakostnaðar. Árið 2016 fengu fimm þýðendur úthlutað dvalarstyrk fyrir árið 2017 en átta umsóknir bárust. Árið áður fengu fjórir dvalarstyrk og fimm sóttu um.

Heildaryfirlit styrkja Miðstöðvar íslenskra bókmennta 2016 má sjá hér: http://www.islit.is/styrkir/uthlutanir/uthlutanir-2016/

Hér má sjá hvaða málsvæði fengu þýðingastyrki árið 2016 og geta sökkt sér í lestur íslenskra bókmennta á eigin tungu.