22 íslenskir rithöfundar í máli og myndum
Sýningin „Sögueyjan Ísland – Portrett af íslenskum samtímahöfundum“ opnar 10. október í borgarbókasafni Frankfurt. Sýningin samanstendur af ljósmyndum Kristins Ingvarssonar og viðtölum Péturs Blöndal við 22 íslenska samtímahöfunda.
Sýningin „Sögueyjan Ísland – Portrett af íslenskum samtímahöfundum“ opnar 10. október í borgarbókasafni Frankfurt. Sýningin samanstendur af ljósmyndum Kristins Ingvarssonar og viðtölum Péturs Blöndal við 22 íslenska samtímahöfunda. Samhliða henni kemur út bókin Isländische Literatur der Gegenwart – 22 Autoren im Gespräch, þar sem viðtölin og ljósmyndirnar eru fest á blað.
Sýningin var síðast sett upp á á íslenskri bókmenntahátíð sem fram fór í Nýju Delí í Indlandi í september, en hún var fyrst sett upp í mars á þessu ári, í sameiginlegum sýningarsal norrænu sendiráðanna í Berlín.
Pétur Blöndal og Kristinn Ingvarsson hafa starfað saman á Morgunblaðinu til fjölda ára og gáfu út viðtalsbókina Sköpunarsögur árið 2007, þar sem skyggnst er inn í sköpunarferli 12 íslenskra samtímahöfunda. Í tilefni af heiðursþátttöku Íslands á Bókasýningunni í Frankfurt heimsóttu þeir 22 íslenska rithöfunda og ræddu við þá um bókmenntaarfinn, áhrif hans á þeirra eigin verk og tengsl hans við heimsbókmenntirnar.
Kristín Marja Baldursdóttir og Kristín Steinsdóttir verða viðstaddar opnunina og munu lesa þar upp úr verkum sínum. Hér á síðunni má lesa viðtal úr bókinni, við Arnald Indriðason, í styttri útgáfu.