Útrásin sem tókst? – Málþing í Norræna húsinu
Föstudaginn 20. apríl verður haldið málþing í Norræna húsinu í tilefni af viku bókarinnar.
Föstudaginn 20. apríl verður haldið málþing í Norræna húsinu í tilefni af viku bókarinnar. Yfirskrift þess er „Útrásin sem tókst? – Íslenskar bókmenntir erlendis“ og hefst það klukkan fjögur.
Stuttar framsögur flytja Laure Leroy, hjá forlaginu Zulma í Frakklandi, sem mun segja frá viðtökum Afleggjarans, eftir Auði Övu Ólafsdóttur, en þær fóru fram úr björtustu vonum þar í landi. Jón Kalman Stefánsson rithöfundur flytur erindi sem hann nefnir: „Erum við ekki alveg örugglega frábær?“ Coletta Bürling, sem hefur þýtt fjölda íslenskra bókmenntaverka á þýsku, nefnir framlag sitt „Þjóðarsálin í þýskum búningi“ og Jón Yngvi Jóhannsson bókmenntafræðingur sitt „Nýtt land í norrænum bókmenntum – Útrás íslenskra bókmennta um aldamótin 1900.“
Að loknum framsögum verða pallborðsumræður um íslenskar bókmenntir erlendis með þátttöku Einars Más Guðmundssonar, sem nýlega hlaut verðlaun Sænsku akademíunnar fyrir höfundarverk sitt, Hólmfríðar Matthíasdóttur, sem stýrir réttindasölu Forlagsins, Þorgerðar Öglu Magnúsdóttur, framkvæmdastjóra Bókmenntasjóðs og Péturs Más Ólafssonar, útgefanda hjá Bjarti-Veröld.
Að málþinginu loknu verður boðið upp á léttar veitingar. Málþingið er haldið af Sögueyjunni, sem hélt utan um þátttöku Íslands á Bókasýningunni í Frankfurt í fyrra, í samvinnu við Rithöfundasamband Íslands og Félag íslenskra bókaútgefenda, með stuðningi Landsbankans.