Fréttir

Bókasýningin í Leipzig 2014

10.3.2014

Bækur Guðrúnar Helgadóttur, Steinunnar Sigurðardóttur, Gerðar Kristnýjar og Auðar Jónsdóttur, sem allar eru nýkomnar út á þýsku, voru kynntar á bókasýningunni í Leipzig 13. - 16. mars.

Bók Gerðar Kristnýjar Bátur með segli og allt kom út í þýskri þýðingu á síðasta ári hjá þýska forlaginu Ullstein Buchverlage GmbH undir nafninu Die grüne Bluse meiner Schwester í þýðingu Tinu Flecken. Bók Gerðar Garðurinn kom einnig út á þýsku í þýðingu Karl-Ludwig Wetzig árið 2011 og hafa báðar bækurnar notið verðskuldaðrar athygli á þýska málsvæðinu. Gerður las á íslenska básnum og einnig í naTo "hinni löngu nótt norrænna bókmennta"  en vert er að vekja sérstaka athygli á dagskránni þar, sem er einn af hápunktum bókasýningarinnar í Leipzig, en þar var Gerður í góðum félagsskap Steinunnar Sigurðardóttur.


Bók Guðrúnar Helgadóttur Bara gaman kom út í fyrra hjá þýska forlaginu Dressler undir nafninu Blaubeeren und Vanilleeis í þýðingu Aniku Lüders-Wolff. Bókin hefur fengið mjög skemmtilegar viðtökur í Þýskalandi og hefur verið endurprentuð tvisvar. Guðrún hafði því miður ekki tök á því að vera viðstödd, en þýska leikkonan Nicole Haase las upp úr bókinni á "Leipzig liest" eða Leipzig les. Þess má geta að Guðrún Helgadóttir fagnar í ár 40 ára rithöfundaafmæli sínu.


Bók Steinunnar Sigurðardóttur Jójó kom út hjá þýska forlaginu Rowohlt 7. mars sl. í þýðingu Colettu 
Bürling. Þetta er áttunda bók Steinunnar sem kemur út á þýsku en Steinunn er búsett í Berlín og hafa bækur hennar notið mikilla vinsælda í Þýskalandi. Steinunn opnaði "Bláa sófann" kl. 10:30 á fyrsta messudegi 13. mars og las nokkrum sinnum á íslenska básnum meðan á sýningunni stóð.

Sendiráð Íslands í Berlín stóð að þátttöku Íslands í Leipzig í samstarfi við Miðstöð íslenskra bókmennta og var básinn í samstarfi við hin norrænu sendiráðin í Berlín. Númerið á básnum var Halle 4, C403.  

Bók Auðar Jónsdóttur, Vetrarsól kom út hjá þýska forlaginu Random House Verlag í Þýskalandi árið 2011 þegar Ísland var heiðursgestur á Bókasýningunni í Frankfurt. Bókin heitir á þýsku Jenseits des Meeres liegt die ganze Welt. Kristof Magnusson þýddi.

Dagskrá höfundanna í Leipzig er hægt að skoða hér