Nýr og notendavænni vefur Miðstöðvar íslenskra bókmennta
Notendavænn vefur fyrir síma- og spjaldtölvur. Meðal nýjunga verða mánaðarleg viðtöl þar sem skyggnst verður inn í heim þýðenda, höfunda eða annarra úr bókmenntaheiminum.
Miðstöð íslenskra bókmennta hefur opnað nýja útgáfu af vef sem gerir notendum kleift að skoða hann í snjallsímum, spjaldtölvum og öllum nettengdum tækjum. Á ensku eru slíkir vefir kallaðir „responsive“ vefir en á íslensku eru þeir ýmist kallaðir skalanlegir eða snjallir vefir.
Á vefnum er auðvelt að nálgast ítarlegar upplýsingar um starfsemi Miðstöðvarinnar, svo sem alla styrki sem hún veitir, en á nýja vefnum er aðgengilegt styrkjadagatal fyrir umsækjendur.
Meðal nýjunga á vefnum verða mánaðarleg viðtöl þar sem skyggnst verður inn í heim þýðenda, höfunda eða annarra úr bókmenntaheiminum.
Vefur Miðstöðvar íslenskra bókmennta var endurhannaður með það að leiðarljósi að vera skýr, aðgengilegur og fallegur og gegna lykilhlutverki í kynningarstarfi hennar og varðveislu upplýsinga um styrkúthlutanir og fleira.
Hugsmiðjan sá um hönnun og uppsetningu vefjarins.