Myndskeið
Skemmtileg viðtöl við höfunda, þýðendur, listamenn og fleiri um íslenskar bókmenntir og menningu.
Haugsnesbardagi í túninu heima
„Það rann mikið blóð hér á Haugsnesgrundum,“ segir Sigurður Hansen bóndi og fyrrverandi lögreglumaður á Kringlumýri í Skagafirði.
Sigurður hefur sviðsett mannskæðasta bardaga Íslandssögunnar sem lýst er í Sturlungu, Haugsnesbardaga sem háður var 19.apríl 1246. Sigurður sótti grjót á gröfunni sinni í nágrennið, 200 kílóa grjóthnullunga, einn fyrir hvern mann sem tók þátt í bardaganum. Hann lét útbúa ryðbrúna járnkrossa fyrir þá sem féllu og festi þá við steinana. Sigurður var rúmt ár að raða þessu upp á melnum. Þetta er einstök stillimynd af stöðu herjanna í upphafi bardagans. Brandur Kolbeinsson fór fyrir liði Ásbirninga sem voru á heimavelli. Þórður Kakali Sighvatsson stjórnaði liði árásarhersins norðan úr Eyjafirði.
Sagan af bardaganum og Sturlunga öll hefur verið Sigurði hjartfólgin frá því hann var strákur. Sturlunga er á náttborðinu, ásamt hinni helgu bók Biblíunni. „Ekki gott að segja hvor bókin er betri,“ segir Sigurður en hann trúir á þær báðar.
Myndataka: Bjarni Felix Bjarnason
Klipping/samsetning: Þorsteinn J.
Tónlist: Amina