Framundan í haust; bókamessurnar í Gautaborg og Frankfurt
Höfundar, útgefendur og Miðstöð íslenskra bókmennta á bókamessum í Gautaborg og Frankfurt í september og október.
Framundan er stórar og rótgrónar bókamessur í Gautaborg og Frankfurt þar sem höfundar koma fram og útgefendur og aðrir bókaunnendur frá öllum heimshornum koma saman til að kynna sér það nýjasta í bókmenntaheiminum.
Miðstöð íslenskra bókmennta verður með aðstöðu á báðum messunum á íslenska básnum og býður gesti og gangandi velkomna að líta við.
Bókamessan í Gautaborg 26.-29. september
Höfundarnir Auður Ava Ólafsdóttir, Kristín Ómarsdóttir, Ragnar Jónasson og Sigrún Eldjárn eru fulltrúar Íslands á Gautaborgarmessunni í ár og ræða m.a. nútímann, ímyndunarafl og ljóðrænu í tungumálinu, nýjar glæpasögur og ofurhetjuna Viktoríu í fjölbreyttri og spennandi dagskrá.
Miðstöð íslenskra bókmennta heldur utan um dagskrá íslensku höfundanna í samráði við stjórnendur messunnar. Íslenski básinn á bókamessunni er í samstarfi við Íslandsstofu en þar eru bækur íslenskra höfunda kynntar og seldar, margar hverjar í sænskum þýðingum og það er Félag íslenskra bókaútgefenda sem hefur umsjón með því. Básinn er númer C03:39 og er hönnun hans í höndum HAF studio . Öll velkomin!
Sjá hér heildardagskrá bókamessunnar í Gautaborg 2019.
Bókamessan í Frankfurt 16.-20. október
Ein stærsta alþjóðlega bókamessa heims hefst í Frankfurt þann 16. október og er Noregur heiðurslandið í ár.
Miðstöð íslenskra bókmennta sækir messuna að venju og kynnir íslenskar bókmenntir alþjóðlegum útgefendum og umboðsmönnum á íslenska básnum, sem Félag íslenskra bókaútgefenda hefur veg og vanda af. Þar verða einnig íslenskir útgefendur en þessi fimm daga alþjóðlega bókamessa er sú stærsta í Evrópu.
Básinn er númer 5.0 B82, verið öll velkomin!
Hægt er að óska eftir fundum á islit@islit.is.