Bókamessan í Gautaborg haldin 26.-29. september 2024
Yrsa Sigurðardóttir, John Swedenmark og Erlingur Óttar Thoroddsen verða meðal gesta í Café Norden á Bókamessunni í Gautaborg
Miðstöð íslenskra bókmennta sækir Bókamessuna heim og hittir norræna bókaútgefendur og aðra sem hafa áhuga á íslenskum bókmenntum.
Bókamessan 40 ára
Bókamessan í Gautaborg er stærsti bókmenntaviðburður á Norðurlöndunum og heldur nú upp á 40 ára afmæli sitt. Boðið er upp á fjölda viðburða, upplestra og annarra uppákoma auk þess sem ýmsir útgefendur og félög eru með bása þar sem bókmenntir eru kynntar fyrir gestum. Þemu hátíðarinnar í ár eru menning Samaþjóðarinnar og himingeimurinn.
Miðstöðin sækir messuna heim
Fulltrúar Miðstöðvar íslenskra bókmennta verða á bókamessunni og fundar með norrænum bókaútgefendum og aðra áhugasama um íslenskar bókmenntir. Mikill áhugi er fyrir íslenskum bókmenntum á Norðurlöndunum og markmiðið með fundunum er að styrkja tengslin við útgefendur og vekja áhuga á nýlegum bókum. Miðstöðin leggur áherslu á að kynna verk sem birtust í kynningarbæklingnum Books from Iceland 2024.
Spennandi viðburður helgaður íslenskri menningu
Föreningen Norden, Sendiráð Íslands í Svíþjóð, Sænsk-íslenski samstarfssjóðurinn og Miðstöð íslenskra bókmennta standa fyrir viðburðinum Café Norden Island á messunni þar sem blandað verður saman líflegum samræðum og tónlist og gestir sem allir tengjast Íslandi á ólíkan hátt hittast og ræða málin á afslöppuðum nótum. Gestir verða: Glæpasagnahöfundurinn Yrsa Sigurðardóttir, kvikmyndaleikstjórinn Erlingur Óttar Thoroddsen, þýðandinn John Swedenmark, söngvarinn Birkir Blær, sigurvegari sænska Idol þáttanna 2021 og fantasíuhöfundurinn Elisabeth Berglund sem meðal annars hlaut hin virtu Selmu-verðlaun í Svíþjóð árið 2023. Stjórnandi viðburðarins er finnlands-sænski listamaðurinn Fredrik Furu.
Frekari upplýsingar um viðburðinn má sjá hér.