Fleiri höfundar komnir á höfundasíðuna
Höfundasíðan er síða á vef Miðstöðvar íslenskra bókmennta. Þar má finna upplýsingar um þá íslenska höfunda bóka sem komið hafa út í þýðingum erlendis - og lista yfir bækurnar.
Höfundasíðan opnaði á vef Miðstöðvar íslenskra bókmennta í haust og hefur hún hlotið afar góðar viðtökur. Á síðunni má finna allar helstu upplýsingar um þá íslenska höfunda bóka sem komið hafa út í þýðingum erlendis - og lista yfir bækurnar. Reglulega hafa nýir höfundar bæst í hópinn.
Á höfundasíðunni er hægt að leita eftir nafni höfundar, bókmenntagrein og/eða tungumáli sem bækurnar hafa verið þýddar á.
Til kynningar erlendis
Upplýsingarnar eru á ensku því þær eru fyrst og fremst ætlaðar til kynningar utan landsteinanna. Markmiðið með höfundasíðunni er að kynna á aðgengilegan hátt íslenska höfunda og um leið að auðvelda erlendum útgefendum, umboðsmönnum, viðburða- og hátíðahöldurum ofl. leitina að íslenskum höfundum og verkum í þýðingum.
Höfundasíðan hefur reynst mörgum gagnleg á tímum heimsfaraldurs og ferðabanns og verður án efa gott verkfæri í kynningu íslenskra höfunda og bókmennta til frambúðar.