Fimm höfundar frá Íslandi koma fram á Bókamessunni í Gautaborg, sem haldin er 28. september til 1. október
Rithöfundarnir Bergsveinn Birgisson, Eiríkur Örn Norðdahl, Hildur Knútsdóttir, Kristín Ragna Gunnarsdóttir og Steinunn Sigurðardóttir taka þátt í dagskránni.
Líkt og undanfarin ár munu íslenskir höfundar og bókmenntir fá sinn sess á bókamessunni og bækur íslenskra höfunda verða kynntar á íslenska básnum. Rithöfundarnir Bergsveinn Birgisson, Eiríkur Örn Norðdahl, Hildur Knútsdóttir, Kristín Ragna Gunnarsdóttir og Steinunn Sigurðardóttir taka þátt í dagskránni.
Bókamessan í Gautaborg verður haldin dagana 28. september til 1. október næstkomandi. Líkt og undanfarin ár munu íslenskir höfundar og bókmenntir fá sinn sess á bókamessunni og bækur íslenskra höfunda verða kynntar á íslenska básnum.
Rithöfundarnir Bergsveinn Birgisson, Eiríkur Örn Norðdahl og Steinunn Sigurðardóttir ræða um hlutverk höfundarins í nútímanum, Steinunn og Eiríkur lesa upp ljóð, Eiríkur tekur þátt í umræðum með norrænum höfundum um lífið á tímum örvæntingar, Hildur Knútsdóttir flytur erindi um börn og hrylling og Kristín Ragna Gunnarsdóttir, sem er tilnefnd til Barna- og unglingabókmenntaverðlauna Norðurlandaráðs í ár kemur fram með öðrum tilnefndum norrænum höfundum.
Miðstöð íslenskra bókmennta hefur undanfarin misseri unnið markvisst að kynningu íslenskra bókmennta á Norðurlöndunum með það að markmiði að fjölga þýðingum íslenskra bókmennta á norræn tungumál og hefur orðið töluverð fjölgun umsókna frá norrænum útgefendum um styrki til þýðinga úr íslensku á Norðurlandamál á liðnum árum.
Um það leyti sem Bókamessan hefst koma út á sænsku bækurnar Ör eftir Auði Övu Ólafsdóttur og Kata eftir Steinar Braga.
Bókamessan í Gautaborg er stærsta bókamessa Norðurlanda en hana sækja árlega um 100.000 gestir. Í bókmenntadagskrá messunnar má finna um 3000 dagskrárliði og rúmlega 800 sýnendur og 2000 höfundar og fyrirlesarar taka þar þátt.
Þátttaka Íslands í messunni er í samstarfi við Íslandsstofu.
Íslenski básinn er númer C04:01 og hönnun hans er í höndum HAF studio (vinnuteikning hér neðar):