Ísland í brennidepli á menningarhátíðinni Les Boréales í Caen, Frakklandi
Rithöfundarnir Auður Ava Ólafsdóttir, Jón Kalman Stefánsson, Sjón, Lilja Sigurðardóttir, Ragnar Helgi Ólafsson, Steinunn Jóhannesdóttir og Ragnar Jónasson koma fram á hátíðinni
Rithöfundarnir Auður Ava Ólafsdóttir, Jón Kalman Stefánsson, Sjón, Lilja Sigurðardóttir, Ragnar Helgi Ólafsson, Steinunn Jóhannesdóttir og Ragnar Jónasson koma fram á hátíðinni.
Bókmennta- og menningarhátíðin Les Boréales stendur frá 16. til 26. nóvember í borginni Caen í Frakklandi. Í ár er Ísland í brennidepli og fjöldi íslenskra rithöfunda og listamanna leggur leið sína á hátíðina til að taka þátt í afar spennandi og fjölbreyttri dagskrá. Þetta er í 26. skipti sem hátíðin er haldin en hún hefur frá upphafi beint sjónum að bókmenntum og menningu Norður- og Eystrarsaltslanda.
Rithöfundarnir Auður Ava Ólafsdóttir, Jón Kalman Stefánsson, Sjón, Lilja Sigurðardóttir, Ragnar Helgi Ólafsson, Steinunn Jóhannesdóttir og Ragnar Jónasson taka þátt í bókmenntadagskrá hátíðarinnar með upplestrum, umræðum, samtali við þýðendur sína og fleiri uppákomum í tengslum við útkomnar bækur sínar á frönsku. Sjá hér nokkrar nýlegar þýðingar höfundanna á frönsku:
Ör eftir Auði Övu Ólafsdóttur í þýðingu Catherine Eyjólfsson.
Mánasteinn eftir Sjón í þýðingu Eric Boury.
Reisubók Guðríðar Símonardóttur eftir Steinunni Jóhannesdóttur í þýðingu Eric Boury.
Bréf frá Bútan eftir Ragnar Helga Ólafsson í þýðingu Jean-Christophe Salaün.
Gildran eftir Lilju Sigurðardóttur í þýðingu Jean-Christophe Salaün.
Eitthvað á stærð við alheiminn eftir Jón Kalman Stefánsson í þýðingu Eric Boury.
Mörk eftir Ragnar Jónasson í þýðingu Philippe Reilly.
Hér má sjá bókmenntadagskrána í heild sinni: http://www.lesboreales.com/auteurs
Á tónlistardagskrá hátíðarinnar verður verk Auðar Övu Ólafsdóttur, Afleggjarinn, túlkað af leikara og píanóleikara. Auk þess koma meðal annarra fram Víkingur Heiðar Ólafsson, Ásgeir Trausti og Amiina. Fjöldi kvikmynda, heimildamynda og þátta eftir íslenskt kvikmyndagerðarfólk verður jafnframt á dagskránni svo sem kvikmyndin Fúsi í leikstjórn Dags Kára, tónlistarmyndin Iceland Songs eftir Ólaf Arnalds og Baldvin Z og stuttmyndin Smáfuglar eftir Rúnar Rúnarsson.
Nánari upplýsingar á vef hátíðarinnar: http://www.lesboreales.com
Íslenskir höfundar ferðast reglulega utan til að kynna bækur sínar á bókmenntahátíðum og víðar allt árið um kring, oft með stuðningi Miðstöðvar íslenskra bókmennta, en það er mikilvægur þáttur í að koma höfundum og verkum þeirra á framfæri erlendis og stuðla að aukinni útbreiðslu íslenskra bókmennta.