Mikil gleði á Bókamessunni í Gautaborg
Bókamessan í Gautaborg fór fram dagana 22.-25. september og voru íslenskar bókmenntir áberandi, bæði í dagskrá hátíðarinnar og á íslenska básnum, en Miðstöð íslenskra bókmennta skipulagði þátttökuna.
Bókamessan í Gautaborg fór fram dagana 22.-25. september og voru íslenskir höfundar og bækur þeirra áberandi. Rithöfundarnir Guðrún Eva Mínervudóttir og Einar Kárason tóku þátt í nokkrum viðburðum ásamt þýðanda sínum John Swedenmark - í samstarfi við útgefendur þeirra í Svíþjóð og Miðstöð íslenskra bókmennta. Miðstöðin sá einnig um íslenska básinn, með stuðningi Íslandsstofu, þar sem gestir gátu skoðað nýjar íslenskar bækur og íslenskar bókmenntir í sænskum þýðingum. Íslenska sendiráðið í Svíþjóð hélt móttöku á opnunardegi messunnar.
Í ár var Suður-Afríka heiðursland og bókmenntir Úkraínu voru í sviðsljósinu undir heitinu Raddir frá Úkraínu. Þema ársins var loftslagsvandinn og glæpasögur fengu einnig aukið rými í dagskránni. Viðburðirnir á messunni voru fjölbreyttir og var fjöldi gesta alla dagana frá morgni til kvöld og mikil ánægja meðal þeirra að geta aftur sótt messuna heim eftir Covid-19.