NordLit fundur haldinn í Osló dagana 15.-17. janúar
Norska bókmenntamiðstöðin NORLA var gestgjafi á árlegum samstarfsfundi NordLit sem eru samtök norrænu bókmenntamiðstöðvanna.
Systurstofnanirnar í NordLit eiga gott og gjöfult samstarf með það sameiginlega markmið að efla sýnileika og útbreiðslu norrænna bókmennta með ýmsum hætti - og geta lært mikið hver af annarri.
Hittast árlega á vinnufundi
Haldinn er einn sameiginlegur vinnufundur starfsfólks bókmenntamiðstöðvanna í janúar ár hvert, til skiptis í höfuðborgum landanna.
Hverjir eru í NordLit?
Auk Miðstöðvar íslenskra bókmennta eru eftirtaldar miðstöðvar í samtökunum: Norla í Noregi, Fili í Finnlandi, FarLit í Færeyjum, Statens Kulturråd/Swedish Arts Council í Svíþjóð og Slots-og kulturstyrelsen/The Danish Arts Council í Danmörku og Greenlit í Grænlandi.
Osló í ár
Að þessu sinni var fundurinn í Osló 15.-17. janúar og Norla, norska bókmenntakynningamiðstöðin, sá um undirbúning og skipulag fundarins. 29 starfsmenn og stjórnendur tóku þátt í fundinum fyrir hönd sjö miðstöðva. Fundirnir fóru fram á skrifstofum NORLA í miðborg Oslóar og var fjallað um ýmis mál er lúta að starfsemi bókmenntamiðstöðvanna, skipst á hugmyndum og leitað leiða til að skerpa á, efla og styrkja starfsemina og útbreiðslu bókmenntanna í víðum skilningi.
NORLA kynnti heiðursþátttökuna
Að þessu sinni fékk hópurinn góða kynningu NORLA á vönduðum undirbúningi og framkvæmd heiðursþátttökunnar í Frankfurt haustið 2019, sem NORLA hafði umsjón með og tókst afar vel. Formaður norskra bókaútgefenda mætti á fundinn og kynnti útgáfuna þar í landi og fleira.
Alfreð Nóbel og nýja listasafnið
Einnig heimsótti hópurinn Friðarverðlaunasetur Alfreðs Nóbel og fengu leiðsögn um nýja listasafnið í Osló sem opnar á næsta ári.
Samvinna innan NordLit á mörgum sviðum
Meðal samstarfsverkefna NordLit er sameiginlegur bás Norðurlandanna á bókamessunum í London og í Bologna, og NordLit skipuleggur auk þess ýmis samvinnuverkefni, þýðendaþing, útgefendaskipti, starfsmannaskipti, útgáfu safnrita og fleira.
Norrænir þýðingastyrkir
Jafnframt vinnur NordLit saman að styrkveitingum til þýðinga á norræn mál og annast danska bókmenntamiðstöðin - Statens Kunstråd (Kunst.dk) utanumhald norrænna þýðingastyrkja fyrir hönd Norrænu ráðherranefndarinnar. Hún útdeilir styrkfénu til hinna systurskrifstofanna, sem veita styrkina í sínu landi.
Ákveðið var að næsti NordLit fundur fari fram í Kaupmannahöfn 12.-14. janúar 2021.