Kleppur er víða
Hvíta bókin, eftir Einar Má Guðmundsson fær stórfínar viðtökur í Danmörku og Þýskalandi. ,,Krísa kapítalismans'' eins og einn gagnrýnandi bendir á, er fráleitt bundin við Ísland.
Hvíta bókin, eftir Einar Má Guðmundsson fær stórfínar viðtökur í Danmörku og Þýskalandi. „Krísa kapitalismans,“ eins og einn gagnrýnandi bendir á, er fráleitt bundin við Ísland. Hvíta bókin sé „Kennslustund í því hvernig hversu illa getur farið þegar þú gengur alla leið.“
Í þýskum fjölmiðlum hefur þýðing Gudrun Marie Hanneck-Klos – sem ber titilinn Svona rústar maður þjóð: Sagan af hruni Íslands / Wie man ein Land in den Abgrund fuehrt: Die Geschichte von Islands Ruin – víða ratað í fréttir um núverandi stöðu Íslands. Í Der Spiegel birtist til að mynda grein undir fyrirsögninni „Orfeus í skuldaheimum“ þar sem segir:
Hann segist ekki vilja predika, en heldur því þó fram að flestir Íslendingar séu hamingjusamari í dag en á tímum góðærisbólunnar – að engu sé líkara en að fargi hafi verið létt af fólki.
Þá hafði Das Parlament, málgagn þýska þingsins, þetta af bókinni að segja:
Lýsing Einars Más á hruninu er 208 blaðsíðna reiðilestur – deilurit. Höfundurinn hálfsextugi er einn þekktasti penni Íslands; þegar hann tekur til máls sperrir fólk eyrun, og hér talar hann fyrir munn fjölmargra reiðra Íslendinga. Bókin er áhugaverð í lýsingum sínum á spilltu tengslaneti viðskipta- og stjórnmálaheimsins, í litlu samfélagi sem aðeins telur 320.000 íbúa. Lesandinn fræðist um framferði „fjármálabarónanna“ sem ferðuðust um á einkaþotum, og réðu Elton John og 50 Cent í samkvæmi sín.
Og í austurríska ríkisútvarpinu, ORF:
Einar Már segist áratugum saman hafa lítinn þátt tekið í stjórnmálum. Kreppan gerði hann, ásamt kollega sínum Hallgrími Helgasyni, að málpípu mótmælahreyfingarinnar sem beitti sér gegn gömlu stjórninni. Kannski var það engin tilviljun að tveir rithöfundar skyldu standa í fremstu víglínu búsáhaldabyltingarinnar svokölluðu, rétt eins og Václav Havel fór fyrir flauelsbyltingunni í Prag tuttugu árum áður. Í báðum tilfellum hafði heilt kerfi glatað trúverðugleika sínum.
Framúrskarandi ritgerðir um krísu kapítalismans
Einar Már hefur einatt notið mikillar velgegngni í Danmörku. Hér eru brot úr dómum dönsku stórblaðana um Hvítu bókina:
„Bókin hrífur mann með sér, hlusta skal þegar einn fremsti núlifandi rithöfundur Íslands kveður sér hljóðs.“
**** Martin Krogh Andersen, Berlingske Tidende
„Framúrskarandi ritgerðir um krísu kapítalismans ... Hvíta bókin er ákaflega vel skrifuð bók ... rammar inn á ótrúlega nákvæman hátt umræðuna um efnahagsástandið, sem fer nú einnig fram í Danmörku.“
***** Poul Aarøe Pedersen, Politiken
„Af næstum froðufellandi losta gegnumlýsir Einar Már Guðmundsson kapítalíska óra þjóðar sinnar ... en mælskulist hans, gamansöm og full vandlætingar, er hressandi ... Hvíta bókin er til fyrirmyndar ... kennslustund í því hvernig hversu illa getur farið þegar þú gengur alla leið.“
Henrik Wivel, Weekendavisen