Stórbrotin náttúra
Í júní kemur út bók um eldsumbrotin í Eyjafjallajökli eftir Ara Trausta Guðmundsson og Ragnar Th. Sigurðsson
Ari Trausti Guðmundsson og Ragnar Th. Sigurðsson hafa síðastliðinn mánuð unnið að bók um eldsumbrotin í Eyjafjallajökli. Hún er væntanleg í bókabúðir þann 4. júni og kemur út á íslensku og ensku undir titlinum Eyjafjallajökull – Stórbrotin náttúra / Eyjafjallajökull – Untamed Nature. Bókaforlagið Uppheimar gefur út.
Í bókinni er gosinu lýst í máli og myndum, frá upphafi eldsumbrotanna til dagsins í dag, ásamt almennum fróðleik um eldvirkni á Íslandi. Áhrif eldgossins innanlands sem utan eru tíunduð. Það hefur valdið umtalsverðu tjóni á íslenskum landbúnaðarsvæðum og truflað alþjóðasamgöngur eins og kunnugt er.
Gosið var áberandi í heimsfréttunum þegar sem mest lét. Ljósmynd bókarkápunnar birtist meðal annars á forsíðu dagblaðsins New York Times, ásamt viðtali við Ragnar (sem finna má hér). Hann á nær allar myndir í bókinni en annar myndhöfundur er Sigurður Stefnisson.
Ari Trausti og Ragnar hafa unnið saman að mörgum bókum um íslensk náttúrufyrirbrigði. Ari er víðkunnur jarðfræðingur, bæði hér á landi og erlendis, og hefur skrifað fjölda bóka um íslenska náttúru. Ragnar er á meðal þekktustu ljósmyndara landsins. Sérsvið hans er náttúruljósmyndun af ýmsu tagi og hafa myndir hans birst víða um heim. Saman stofnuðu þeir bókaútgáfuna Arctic Books árið 1996 og gáfu meðal annars út bókina Vatnajökull – Frost og funi / Ice on fire um Gjálpargosið í Vatnajökli árið 1996.