Gnægð fróðleiks

9. júlí, 2010

Þýskri útgáfu af vefsíðunni Handritin heima var hleypt af stokkunum við hátíðlega athöfn í Norðurlandadeild Christian-Albrechts háskólans í Kiel, þann 23. júní síðastliðinn. Vefsíðan, sem hefur verið til í íslenskri útgáfu um nokkurt skeið, inniheldur gnægð fróðleiks um íslenska handritamenningu – allt frá upplýsingum um verkun kálfskinnanna sem ritað var á, yfir í umfjallanir um skemmtilegar spássíumyndir í handritunum.
 
Í ræðu sinni sagði Prófessor Klaus Böldl, forstöðumaður Norðurlandadeildarinnar, að þýska síðan myndi reynast ómetanlegur fróðleiksbrunnur – ekki bara fyrir námsmenn, heldur líka alla þá sem áhuga hefðu á íslenskri handritamenningu. Sendiherra Íslands, Gunnar Snorri Gunnarsson, lýsti því þá yfir að smáþjóð á borð við Ísland væri í stöðugri leit að sjálfsmynd, og að handritamenning Íslendinga væri mikilvægur hluti hennar.
 
Höfundar efnisins á síðunni eru þær Laufey Guðnadóttir, lektor í íslensku við skólann, og Soffía Guðný Guðmundsdóttir. Tveir nemendur í norrænni fílólógíu, Sarah Strühning og Michael Schäfer, þýddu síðan efnið yfir á þýsku undir handleiðslu Laufeyjar og prófessor Böldl.
 
Sagenhaftes Island, sem styrkti gerð þýsku síðunnar, óskar aðstandendum verkefnisins til hamingju með vel heppnað verk.
 
Þýsku síðuna má finna hér.