Ljóðstafur Jóns úr Vör veittur í tíunda skiptið
Steinunn Helgadóttir, myndlistarmaður og ljóðskáld, hlaut Ljóðstaf Jóns úr Vör í árlegri ljóðasamkeppni lista- og menningarráðs Kópavogs.
Steinunn Helgadóttir, myndlistarmaður og ljóðskáld, hlaut Ljóðstaf Jóns úr Vör fyrir ljóð sitt „Kaf“ í árlegri ljóðasamkeppni lista- og menningarráðs Kópavogs. Steinunn er tíundi handhafi verðlaunanna en tilgangur samkeppninnar er að efla og vekja áhuga á íslenskri ljóðlist.
Þriggja manna dómnefnd – skipuð Gerði Kristnýju, Jóni Yngva Jóhannssyni og Sigurði Pálssyni – valdi ljóð Steinunnar úr 342 innsendum ljóðum, sem öll bárust samkeppninni undir dulnefni. Í rökstuðningi dómnefndarinnar segir meðal annars að ljóð Steinunnar bregði „upp áhrifamiklum myndum af síðustu ferð rússneska kafbátsins Kursk sem fórst með allri áhöfn í Barentshafi árið 2000 [...] Höfundur kann vel þá vandasömu list að ljúka ljóði. Lokalínurnar tengjast upphafslínunni með sterku myndmáli og í lokaorðunum eru örlög skipverjanna gefin í skyn með lágstemmdum en áhrifaríkum hætti.“
Verðlaunaafhendingin fór fram við hátíðlega athöfn í Salnum, Tónlistarhúsi Kópavogs, að kvöldi fæðingardags Jóns úr Vör, 21. janúar. Þar var að auki kynnt ljóðakver, gefið út af lista- og menningarráði, sem hefur að geyma ljóð allra handhafa Ljóðstafsins frá upphafi, en meðal fyrri verðlaunahafa má nefna skáldin Lindu Vilhjálmsdóttur, Óskar Árna Óskarsson og Gerði Kristnýju. Von er á fyrstu ljóðabók Steinunnar síðar á þessu ári sem bókaforlagið Uppheimar gefur út.