Styrkur úr Menningaráætlun Evrópusambandsins

7. mars, 2011

Verkefnið „Sögueyjan Ísland – heiðursgestur Bókasýningarinnar í Frankfurt 2011“ hefur hlotið styrk frá Menningaráætlun Evrópusambandsins og nemur styrkupphæðin 200.000 evrum eða ríflega 32 milljónum íslenskra króna.

Í aðdraganda Bókasýningarinnar í Frankfurt sem fram fer í október á þessu ári stendur Sögueyjan fyrir metnaðarfullri menningardagskrá þar sem íslenskar bókmenntir verða kynntar með ýmsum hætti auk þess sem áhersla verður lögð á íslenska list og hönnun. Evrópustyrknum verður einkum varið í dagskrá sem helguð er norrænum sagnaarfi, rótum norður-evrópskrar sagnahefðar, og verða Íslendingasögur og Eddukvæði í sviðsljósinu í þeirri viðamiklu dagskrá. Samstarfsaðilar Sögueyjunnar Íslands í þessu verkefni eru Literaturhaus Köln í Þýskalandi og Literaturhaus Salzburg í Austurríki.

Meðal þeirra verkefna sem Sögueyjan Ísland stendur að er samvinnuverkefni þriggja íslenskra listamanna og þriggja þýskra ungskálda um Íslendingasögur og upplifun nútímamannsins af þeim. Þau munu sýna á Listahátíð í Reykjavík í vor auk þess sem verkið verður sýnt í bókmenntahúsum í Þýskalandi, Austurríki og Sviss í aðdraganda Bókasýningarinnar í október.

Þá verður blásið til mikillar útgáfuhátíðar vegna hinnar nýju þýðingar Íslendingasagnanna á þýsku sem kemur út hjá S. Fischer Verlag í haust. Útgáfunni verður fagnað með þriggja daga ráðstefnu í klaustrinu í Corvey í Þýsklandi þar sem fræðimenn, þýðendur og aðrir munu taka þátt auk þess sem leiklesið verður úr sögunum. Einnig verður dagskrá í bókmenntahúsum Þýskalands, Austurríkis og Sviss helguð Íslendingasögunum og Eddukvæðum.

8. júní næstkomandi verður haldinn íslenskur ljóðadagur í bókmenntahúsum hins þýskumælandi heims í tilefni af útkomu safnrits um íslenska ljóðlist hjá Suhrkamp Verlag.

Dagskráin mun fara fram á ellefu stöðum samtímis. Leikarar munu lesa nýjar þýskar þýðingar á íslenskum ljóðum og sýnd verða ljóðamyndbönd sem nemendur við Listaháskóla Íslands hafa framleitt fyrir Ljóðadaginn. Auk þess munu allir gestir bókmenntahúsanna 8. júní fá eintak af safnritinu að gjöf.

Loks er að geta sýningar Gabríelu Friðriksdóttur í Schirn listasafninu í Frankfurt. Hluti hennar verður sýning á íslenskum handritum í anda þeirrar stefnu Sögueyjunnar að vefa saman hefð og samtímalist í kynningu sinni.

Ljóst er að sýningar og viðburðir sem Sögueyjan stendur að í tengslum við íslenskan bókmenntaarf í nútíð og fortíð geta vænst þess að fá mikla athygli fjölmiðla og almennings í Þýskalandi. Styrkurinn frá Menningaráætlun Evrópusambandsins skiptir sköpum þegar kemur að framkvæmd þessa verkefnis og sýnir jafnframt það traust sem borið er til þeirrar undirbúningsvinnu sem unnið er á vegum Sögueyjunnar.