Listin borin alla leið
Icelandair Cargo hefur gengið til liðs við Sögueyjuna og gerst einn af styrktaraðilum verkefnisins. Icelandair Cargo mun sjá um flutning á listaverkum fyrir Sögueyjuna í haust.
Icelandair Cargo hefur gengið til liðs við Sögueyjuna og gerst einn af styrktaraðilum verkefnisins. Icelandair Cargo mun sjá um flutning á listaverkum fyrir Sögueyjuna í haust en í tengslum við heiðursþátttöku Íslands á Bókasýningunni í Frankfurt í október eru fyrirhugaðar fjölmargar sýningar.
Í september opnar sýningin Crepusculum í Schirn listasafninu í Frankfurt en hana hefur myndlistarmaðurinn Gabríela Friðriksdóttir gert utan um handrit Íslendingasagna. Í október opnar í sama safni sýning á Skrímslamyndsyrpu Errós. Þá eru fjölmargar aðrar sýningar fyrirhugaðar, svo sem ljósmyndasýning átta íslenskra ljósmyndara, hönnunarsýning og sýning á verkum Ragnars Kjartanssonar svo fátt eitt sé nefnt.
Það er ljóst að stuðningur Icelandair Cargo við flutning listaverka til Frankfurt í haust kemur sér afar vel fyrir Sögueyjuna og fagna forsvarsmenn Sögueyjunnar og Icelandair Cargo samstarfinu.