„Bændur flugust á“ á Listahátíð
Ljóða-, leikhús-, sagna- og tónlistarsýningin „Bændur flugust á“ á Listahátíð í Reykjavík. Sex listamenn velta fyrir sér sagnaarfinum og þjóðardrambi Íslendinga í Tjarnarbíói.
Eru Íslendingasögurnar heimild um stórmennsku Íslendinga á miðöldum eða voru þær Eurovision-framlag síns tíma? Hafa útlendingar einhvern áhuga á Íslendingasögum eða þarf að tjúna sögurnar upp með álfum og einhyrningum til að þær passi inn í þá ímynd sem þeir hafa af Íslandi?
Þessu, og ýmsu öðru, sem varðar sagnaarfinn og þjóðardramb Íslendinga, velta sex listamenn fyrir sér í ljóða-, leikhús-, sagna- og tónlistarsýningunni „Bændur flugust á“, sunnudaginn 29. maí kl. 20 í Tjarnarbíói.
Frá Þýskalandi koma Nora Gomringar, Finn-Ole Heinrich og Hannes Wittmer sem er einnig þekktur sem Spaceman Spiff, en fulltrúar Íslands eru þau Bergur Ebbi Benediktsson, Halldór Halldórsson og Ugla Egilsdóttir. Um tónlist og grafíkvinnslu sér þýski skífuþeytirinn Dj Kermit.
Í haust mun þessi sýning verða sett upp víðsvegar um Þýskaland í aðdraganda heiðursþátttöku Íslands á Bókasýningunni í Frankfurt.