Bókmenntaverðlaun Evrópusambandsins

1. desember, 2011

Ófeigur Sigurðsson tók á mánudaginn var við Bókmenntaverðlaunum Evrópusambandsins við hátíðlega athöfn í Brussel. Verðlaunin hlýtur hann fyrir bókina Skáldsagan um Jón, sögulega skáldsögu um Jón Steingrímsson eldklerk, sem kom út í fyrra.

Ófeigur er í hópi tólf evrópskra rithöfunda sem hljóta verðlaunin. Hver höfundur fær 5.000 evrur að launum auk möguleika á ríflegum þýðingarstyrkjum, sem greiða leið verka þeirra inn á önnur málsvæði.

Markmið Bókmenntaverðlauna Evrópusambandsins er að varpa ljósi á menningarleg verðmæti evrópskra samtímaskáldverka, auka dreifingu þeirra innan álfunnar og hvetja til menningarsamræðna milli þjóða.

Skáldsagan um Jón er önnur skáldsaga Ófeigs, frá honum hafa einnig komið ljóðabækur.