Tilnefningar til Bókmenntaverðlauna Norðurlandaráðs
Guðmundur Andri Thorsson og Hallgrímur Helgason eru tilnefndir til Bókmenntaverðlauna Norðurlandaráðs 2013 fyrir Íslands hönd.
Tilnefningar til Bókmenntaverðlauna Norðurlandaráðs liggja nú fyrir og eru það höfundarnir Guðmundur Andri Thorsson og Hallgrímur Helgason sem eru tilnefndir fyrir Íslands hönd. Hallgrímur er tilnefndur fyrir skáldsöguna Konan við 1000° og Guðmundur Andri fyrir sagnasveiginn Valeyrarvalsinn.
Tilkynnt verður um verðlaunahafann á þingi Norðurlandaráðs í Osló í lok október á næsta ári. Verðlaunin nema 350.000 dönskum krónum, eða um sjö milljónum íslenskra króna. Norska skáldið Merethe Lindstrøm hlaut síðast verðlaunin, þar áður fékk Gyrðir Elíasson þau fyrir smásagnasafnið Milli trjánna.
Bókmenntaverðlaun Norðurlandaráðs hafa verið veitt allt frá árinu 1962, og eru ætluð til þess að vekja athygli og auka áhuga á bókmenntum og tungumálum Norðurlandanna.