Nýr kynningarlisti, bókamessur, Bókmenntahátíðir í Reykjavík og Caen í Frakklandi á meðal verkefna í haust
Nýr kynningarlisti, erlendir blaðamenn á Bókmenntahátíð í Reykjavík, bókamessur í Gautaborg og Frankfurt og íslenskir rithöfundar og listamenn í brennidepli á frönsku bókmennta- og menningarhátíðinni Les Boréales eru meðal bókmenntakynningaverkefna og -viðburða sem Miðstöð íslenskra bókmennta kemur að í haust.
Fókuslisti og bókamessur í haust
Á meðal verkefna Miðstöðvar íslenskra bókmennta í haust er að taka saman kynningarlista yfir nýleg íslensk verk sem talin eru eiga sérstakt erindi við erlenda lesendur og útgefendur. Listinn verður svo kynntur fyrir erlendum bókaútgefendum og kynningaraðilum á bókamessum í Gautaborg og Frankfurt í haust.
Erlendir blaðamenn á Bókmenntahátíð í Reykjavík
Að auki stendur miðstöðin fyrir kynningarferð erlendra blaðamanna á Bókmenntahátíð í Reykjavík í september í samstarfi við Bókmenntahátíð í Reykjavík, Bókmenntaborgina og Íslandsstofu. Bókmenntahátíð í Reykjavík er haldin annað hvert ár en þangað er boðið virtum erlendum rithöfundum sem og íslenskum, auk valinna erlenda útgefenda og blaðamanna.
Ísland og Litháen í brennidepli á
bókmennta- og menningarhátíðinni Les Boréales í Caen í Frakklandi í nóvember
Hópur íslenskra rithöfunda og myndlistar-, tónlistar- og kvikmyndagerðarfólks hefur verið boðinn á frönsku bókmennta- og menningarhátíðina Les Boréales í Caen í Frakklandi í nóvember en í ár verða Ísland og Litháen í brennidepli. Þetta verður í 22. skiptið sem hátíðin er haldin en hún hefur frá upphafi beint sjónum að bókmenntum og menningu Norður- og Eystrarslanda. Miðstöð íslenskra bókmennta styrkir hátíðina vegna þátttöku íslenskra höfunda í dagskrá hátíðarinnar.