Norðurlandaátak hefst
Næstu þrjú árin stendur Miðstöð íslenskra bókmennta fyrir átaki á Norðurlöndum sem miðar að því að fjölga þýðingum íslenskra bókmennta á norræn tungumál. Á meðal þess sem átakið felur í sér eru sérstakar kynningar í samstarfi við sendiráð Íslands á Norðurlöndum. Í dag 14. maí er kynning í Stokkhólmi.
Andri Snær Magnason og Þorgerður E. Sigurðardóttir, bókmenntafræðingur og formaður dómnefndar fagurbókmennta Íslensku bókmenntaverðlaunanna, ræða í dag strauma og stefnur í íslenskum samtímabókmenntum í sendiráði Íslands í Stokkhólmi og á morgun 15. maí í sendiráði Íslands í Kaupmannahöfn.
Árið 2015 er fyrirhugað að kynna íslenskar bókmenntir fyrir útgefendum í Finnlandi, Noregi, Grænlandi og Færeyjum í samstarfi við sendiráð Íslands í löndunum.
Ennfremur verður lögð áhersla á sýnileika íslenskra höfunda og bókmennta í dagskrá bókamessunnar í Gautaborg í Svíþjóð á næstu árum, en bókamessan í Gautaborg er stærsta bókamessa Norðurlanda en hana sækja árlega um 100.000 gestir.