Atómskáldin á þýsku
Sumarið 2011 stendur til að gefa út bók um atómskáldin í Þýskalandi, ljóðaúrval þar sem sjónum verður beint að ljóðum fimm nútímaskálda sem voru fremst í flokki þeirrar formbyltingar sem varð í íslenskri ljóðlist á 20. öld.
Sumarið 2011 stendur til að gefa út bók um atómskáldin í Þýskalandi, ljóðaúrval þar sem sjónum verður beint að ljóðum fimm nútímaskálda sem voru fremst í flokki þeirrar formbyltingar sem varð í íslenskri ljóðlist á 20. öld; kvæðum Einars Braga, Hannesar Sigfússonar, Jóns Óskars, Sigfúsar Daðasonar og Stefáns Harðar Grímssonar.
Ritstjórar bókarinnar eru Eysteinn Þorvaldsson og Wolfgang Schiffer, leiklistarstjóri útvarpsstöðvarinnar WDR í Köln. Schiffer, sem nú er staddur hér á landi við efnisöflun, hefur um árabil unnið að kynningu á íslenskri ljóðlist í Þýskalandi, meðal annars í bókmenntatímaritinu Die Horen þar sem mörg íslensk ljóðskáld hafa verið kynnt.
Í bókinni verður áhersla lögð á fyrsta tímabil í skáldanna og sögulegu mikilvægi ljóðanna gerð skil; hún verður með óhefðbundnu sniði þar sem blandað verður saman ljóðaþýðingum, umfjöllun um tímabilið, pólitísk átök og deilur um skáldin og list þeirra. Einnig verða í bókinni hugleiðingar samtímaskálda um atómskáldin, þar á meðal eru Gyrðir Elíasson, Sjón, Einar Már Guðmundsson og Steinunn Sigurðardóttir.
Wolfgang Schiffer tekur fagnandi hvers konar úrklippum og ljósmyndum sem tengjast ljóðskáldunum á þessu tímabili, og má hafa samband við hann með því að skrifa til info@sagenhaftes-island.is.