Yrsa á rússnesku
Bókaforlagið Veröld samdi nú á dögunum við stærsta forlag Rússlands, AST, um útgáfu á tveimur skáldsögum Yrsu Sigurðardóttur.
Bókaforlagið Veröld samdi nú á dögunum við stærsta forlag Rússlands, AST, um útgáfu á tveimur skáldsögum Yrsu Sigurðardóttur: Þriðja táknið og Sér grefur gröf. Forlagið hefur á sínum snærum marga af vinsælustu rithöfundum heims, svo sem Dan Brown, Stephen King, Stephanie Meyer, Chuck Palahniuk og John Grisham. Nú slæst Yrsa í hópinn.
Sér grefur gröf kom út á Bretlandseyjum fyrr á þessu ári, í þýðingu Bernard Scudder, og vakti mikla lukku meðal gagnrýnenda og glæpasagnaaðdáenda. Útgefandi Yrsu í Englandi, Hodder & Stoughton hefur í framhaldi af velgengni bókarinnar tryggt sér réttinn útgáfu á næstu tveimur bókum hennar, Auðnin og Aska. Ekki má heldur gleyma að til stendur að gefa út Sér grefur gröf á arabísku, en samningar tókust á milli Bókaforlagsins Veraldar og egypska útgefandans Arabesque Publishing Press síðasta vor.
Stutt er í næstu glæpasögu Yrsu, en hún væntanleg fyrir jól.