Andra Snæ Magnasyni veitt evrópsk menningarverðlaun
KAIROS verðlaunin eru veitt fyrir að sameina listrænt og samfélagslegt starf
Verðlaunin verða afhent þann 28. febrúar 2010 og nemur verðlaunaféð 75.000 evrum. Þau eru á vegum Alfred Toepfer stofnunarinar og ætluð listamönnum á sviði myndlistar, tónlistar, arkitektúrs, kvikmyndunar, ljósmyndunar, bókmennta og fjölmiðlunar. Verðlaunin eru nefnd eftir gríska guðinum KAIROS sem var guð hinnar “réttu stundar” og eru hugsuð sem hvatningarverðlaun. Alfred Toepfer stofnunin hefur um langt skeið veitt verðlaun á sviði menningar og lista, og er fólk eins og Harold Pinter, Pina Bauschs, Imre Kertesz og Ólafur Elíasson meðal þeirra sem þau hafa hlotið.
Dómnefndin byggði val sitt meðal annars á því að höfundi hafi tekist að snúa við friðsælu sambandi skálda við náttúruna, í stað hyllingar hvetji hann til virkni. Í áliti hennar segir: Andri Snær “telur ekki að ljóðlist og barátta í þágu móður jarðar, fagurfræðileg skynjun og friðsamleg mótmæli útiloki hvert annað, heldur styðji þau hvert annað”. Enn fremur að bók hans Draumalandið, sem kom út árið 2006 þar sem hann fjallar um áhrif stóriðju á íslenska náttúru, hafi átt sinn þátt í valinu. Í fréttatilkynningu Alfred Toepfer stofnunarinnar segir: “Með húmor og sannfæringarkrafti ljáir hann óhugmyndafræðilegri en kraftmikilli grasrótarhreyfingu á Íslandi rödd sína og sköpunarhæfileika”.