Þýðendaþing Miðstöðvar íslenskra bókmennta tileinkað Sjón
Þingið fór fram í lok apríl og að þessu sinni var áhersla lögð á þýðingar verka Sjóns og áttu allir þátttakendur það sameiginlegt að hafa þýtt verk eftir höfundinn og skáldið úr íslensku á sín móðurmál
Miðstöð íslenskra bókmennta efndi til alþjóðlegs þýðendaþings í Reykjavík dagana 28. og 29. apríl 2025 en Miðstöðin hefur haldið slík þing annað hvert ár frá árinu 2017 með þátttakendum víðs vegar að úr heiminum.
Miðstöð íslenskra bókmennta efndi til alþjóðlegs þýðendaþings í Reykjavík dagana 28. og 29. apríl 2025 en Miðstöðin hefur haldið slík þing annað hvert ár frá árinu 2017 með þátttakendum víðs vegar að úr heiminum. Að þessu sinni tóku þátt 12 þýðendur frá jafnmörgum málsvæðum.
Áhugi á íslenskum bókmenntum er mikill víða um heim og erlendar þýðingar bókmenntanna gegna lykilhlutverki í útbreiðslu þeirra um heiminn. Markmið okkar með þýðendaþingum á Íslandi er að hvetja þýðendur íslenskra bókmennta til dáða og auðvelda þeim að komast í snertingu við íslenskar bækur, höfunda og menningu á líðandi stund, sem og að fá nýtt fólk til starfans svo eðlileg endurnýjun verði í faginu.
Áhersla á þýðingar verka Sjóns
Að þessu sinni var lögð áhersla á þýðingar verka Sjóns og áttu allir þátttakendur í þýðendaþinginu það sameiginlegt að hafa þýtt verk eftir höfundinn og skáldið úr íslensku á sín móðurmál.
Til umræðu var m.a. nýlegt greinasafn um Sjón, Critical Approaches to Sjón: North of the Sun, sem Routledge gaf út, í ritstjórn Lindu Badley, prófessor emerita í ensku og kvikmyndafræði við Háskólann í Middle Tennessee State, Úlfhildar Dagsdóttur, bókmenntafræðings og rithöfundar og Gitte Mose, prófessor emerita við Háskólann í Osló.
Greinasafnið er fyrsta bókin sem kemur út á ensku um íslenskan samtímahöfund og sú fyrsta á erlendu máli um íslenskan nútímahöfund síðustu sex áratugina eða svo. Í bókinni er lesendum gefin innsýn í hinn sérstæða og fjölbreytilega skáldskap Sjóns, auk þess sem lögð er áhersla á önnur verk hans á sviði kvikmynda og myndlistar.
Á þinginu flutti Ásta Kristín Benediktsdóttir, dósent í íslenskum samtímabókmenntum við Háskóla Íslands flutti erindið: „Fortíðin sem aldrei var og framtíðin sem aldrei kom: Hinsegin þræðir í höfundarverki Sjóns og Kristín Svava Tómasdóttir leiddi göngu um söguslóðir Mánasteins eftir Sjón.
Verk Sjóns hafa verið þýdd á fjölda tungumála og hafa vakið verðskuldaða athygli. Bækur hans, ljóð og önnur verk eru fjölbreytt og innihalda ólíka þræði, þemu og stíl. Á þýðendaþinginu gafst þýðendum tækifæri á að vinna með texta Sjóns á afslappaðan og skapandi hátt, eiga samverustund með höfundinum og kynnast öðrum þýðendum sem hafa einnig þýtt verk hans.Dagskrá varði í tvo daga og var blanda af fyrirlestrum, vinnustofum, heimsóknum og skemmtilegri samveru. Þingið var haldið í beinu framhaldi af Bókmenntahátíð í Reykjavík 2025.